തിരുവനന്തപുരം: സ്വര്ണക്കടത്ത് കേസ് പ്രതി സ്വപ്ന സുരേഷിനെ ഇ ഡി ഇന്ന് ചോദ്യം ചെയ്യും. മുഖ്യമന്ത്രിയുടെ മുന് പ്രിന്സിപ്പല് സെക്രട്ടറി ശിവശങ്കറിനെതിരെ സ്വപ്ന സുരേഷ് നടത്തിയ വെളിപ്പെടുത്തലിന്റെ അടിസ്ഥാനത്തിലാണ് ഇ ഡി ഇന്നും ചോദ്യം ചെയ്യുന്നത്. കസ്റ്റഡിയിൽ ഇരിക്കെ മുഖ്യമന്ത്രിയുടെ പേര് പറയാന് എന്ഫോഴ്സ്മെന്റ് നിര്ബന്ധിച്ചുവെന്ന ശബ്ദരേഖയ്ക്ക് പിന്നില് എം.ശിവശങ്കര് നടത്തിയ ഗൂഢാലോചനയാണെന്നായിരുന്നു സ്വപ്ന സുരേഷ് വിവാദ വെളിപ്പെടുത്തല്.
ശബ്ദരേഖ പുറത്ത് വന്നതിന് പിന്നാലെ ഇഡി, ഡിജിപിക്ക് പരാതി നല്കിയിരുന്നു. എന്നാൽ സ്വപ്നയ്ക്ക് കാവല് നിന്ന പൊലീസുകാരുടെ മൊഴിയെടുത്ത് ഇഡി ഉദ്യോഗസ്ഥരെ പ്രതികളാക്കുകയാണ് പൊലീസ് ചെയ്തത്. കേസ് ഹൈക്കോടതി റദ്ദാക്കിയെങ്കിലും സർക്കാർ ഇതിനെതിരെ ഡിവിഷൻ ബഞ്ചിനെ സമീപിച്ചിട്ടുണ്ട്. ഈ കേസിൽ സ്വപ്നയുടെ വെളിപ്പെടുത്തൽ നിർണായകമാകുമെന്നാണ് ഇഡി ഉദ്യോഗസ്ഥർ വ്യക്തമാക്കുന്നത്.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
ശിവശങ്കറിന്റെ ആത്മകഥയായ 'അശ്വത്ഥാമാവ് വെറും ഒരു ആന' എന്ന പുസ്തകം പുറത്തിറങ്ങിയതോടെയാണ് സ്വപ്ന സുരേഷ് പുതിയ വെളിപ്പെടുത്തല് നടത്തിയത്. 'കസ്റ്റംസ് ബാഗേജ് തടഞ്ഞുവച്ചപ്പോള് ആദ്യം വിളിച്ചത് ശിവശങ്കറിനെയായിരുന്നു. എന് ഐ എ അന്വേഷണത്തിലേക്ക് കേസിനെ എത്തിച്ചത് അദ്ദേഹത്തിന്റെ ബുദ്ധിയാണ്. ഞാന് ആരോടും ഒന്നും പറയാതിരിക്കാനാണ് ഇത്തരം നീക്കങ്ങള് നടന്നത്. മറ്റാര്ക്കും പങ്കില്ലെന്ന് എന്നെക്കൊണ്ട് പറയിപ്പിച്ചതാണ്. ശിവശങ്കര് അടക്കമുള്ള ആളുകളുടെ നിര്ദ്ദേശാനുസരണമാണ് ഒളിവില് പോയത്. സന്ദീപും ജയശങ്കറുമാണ് അതിര്ത്തി കടന്ന് രക്ഷപ്പെടാന് സഹായിച്ചതെന്നുമായിരുന്നു' സ്വപ്ന സുരേഷിന്റെ വെളിപ്പെടുത്തല്.