തിരുവനന്തപുരം മേയര് ആര്യാ രാജേന്ദ്രനും സച്ചിന് ദേവ് എം എല് എയും വിവാഹിതരായി. എ കെ ജി സെന്ററില് രാവിലെ പതിനൊന്നുമണിയോടെയായിരുന്നു വിവാഹം. ഇരുവരും പരസ്പരം ചുവന്ന രക്തഹാരം അണിയിക്കുകയും ഹസ്തദാനം ചെയ്യുകയും മാത്രമാണ് ചെയ്തത്. ലളിതമായി നടത്തിയ ചടങ്ങില് മുഖ്യമന്ത്രി പിണറായി വിജയനും സി പി എം സംസ്ഥാന സെക്രട്ടറി എം വി ഗോവിന്ദനും മന്ത്രിമാരുമുള്പ്പെടെ സാമൂഹ്യ-രാഷ്ട്രീയ രംഗത്തെ പ്രമുഖര് പങ്കെടുത്തു. വിവാഹത്തിന് യാതൊരു വിധത്തിലുളള ഉപഹാരങ്ങളും സ്വീകരിക്കില്ലെന്ന് മേയര് നേരത്തെ വ്യക്തമാക്കിയിരുന്നു. അത്തരത്തില് സ്നേഹോപഹാരങ്ങള് നല്കണമെന്നാഗ്രഹിക്കുന്നവര് നഗരസഭയുടെ വൃദ്ധ സദനങ്ങളിലേക്കോ അഗതി മന്ദിരങ്ങളിലേക്കോ മുഖ്യമന്ത്രിയുടെ ദുരിതാശ്വാസ നിധിയിലേക്കോ നല്കണമെന്നാണ് മേയര് പറഞ്ഞത്.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
കഴിഞ്ഞ മാര്ച്ച് ആറിനായിരുന്നു ഇരുവരുടെയും വിവാഹനിശ്ചയം നടന്നത്. കേരളാ നിയമസഭയിലെ ഏറ്റവും പ്രായംകുറഞ്ഞ എം എല് എയും രാജ്യത്തെ പ്രായംകുറഞ്ഞ മേയറുമാണ് വിവാഹിതരായത്. ബാലസംഘം മുതല് ഒരുമിച്ച് പ്രവര്ത്തിച്ച പരിചയമാണ് വിവാഹത്തിലെത്തിയത്. ബാലസംഘം, എസ്എഫ്ഐ പ്രവര്ത്തന കാലത്തുതന്നെ ഇരുവരും സുഹൃത്തുക്കളായിരുന്നു. ഇക്കഴിഞ്ഞ തെരഞ്ഞെടുപ്പിലാണ് സച്ചിന് ദേവ് നിയമസഭയിലേക്ക് മത്സരിക്കുന്നത്. നടനായ കോണ്ഗ്രസ് സ്ഥാനാര്ഥി ധര്മജന് ബോള്ഗാട്ടിയെയാണ് അദ്ദേഹം പരാജയപ്പെടുത്തിയത്. തിരുവനന്തപുരം ഓള് സെയിന്റ്സ് കോളേജില് വിദ്യാര്ഥിയായിരിക്കെയാണ് രാജ്യത്തെ ഏറ്റവും പ്രായം കുറഞ്ഞ മേയറായി ആര്യ തെരഞ്ഞെടുക്കപ്പെടുന്നത്. ബാല സംഘത്തിന്റെ സംസ്ഥാന പ്രസിഡന്റും എസ് എഫ് ഐ സംസ്ഥാന കമ്മിറ്റി അംഗവുമാണ് ആര്യ.