തിരുവനന്തപുരം: കെ എസ് ആര് ടി സിയുടെ എം ഡി ചുമതലയില് നിന്നും ബിജു പ്രഭാകറിനെ നീക്കണമെന്ന് സിപിഐ സംസ്ഥാന സെക്രട്ടറി കാനം രാജേന്ദ്രന്. പൊതുമേഖല സ്വകാര്യവത്ക്കരണത്തെ അംഗീകരിക്കുന്ന ആളാണ് ബിജു പ്രഭാകറെന്നും അത് എല് ഡി എഫ് സര്ക്കാരിന്റെ നയമല്ലെന്നും കാനം രാജേന്ദ്രന് പറഞ്ഞു. ബിജു പ്രഭാകറിന്റെത് അച്ചടക്ക ലംഘനമാണ്, കേന്ദ്രസര്ക്കാര് നയങ്ങളെയാണ് അദ്ദേഹം പിന്തുണയ്ക്കുന്നത്. അത് അംഗീകരിക്കാന് സാധിക്കില്ല- കാനം കൂട്ടിച്ചേര്ത്തു. കെ എസ് ടി എ സംഘ് സംസ്ഥാന സമ്മേളന വേദിയിലെ ബിജു പ്രഭാകറിന്റെ പ്രസംഗത്തോട് പ്രതികരിക്കുകയായിരുന്നു കാനം.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
പ്രസംഗത്തില് സംസ്ഥാന സര്ക്കാര് നടപ്പിലാക്കിയ കൊവിഡ് കാല നിയന്ത്രണങ്ങളെ ബിജു പ്രഭാകര് ശക്തമായി വിമര്ശിച്ചിരുന്നു. മദ്യശാലകള് അടച്ചിട്ടതിനേയും ബസുകളിലെ നില്പ് യാത്ര നിരോധിച്ചതിനെയും അദ്ദേഹം വിമര്ശിച്ചു. പൊതുഗതാഗതം ശക്തിപ്പെടുത്തുന്ന നിലപാടല്ല സംസ്ഥാന സര്ക്കാരിനുള്ളതെന്നും 20 ലക്ഷം ആളുകളെ കൊണ്ടുപോകുന്ന പൊതുഗതാഗതത്തെ അവഗണിച്ചുകൊണ്ട് മെട്രോ പദ്ധതികള്ക്ക് വേണ്ടിയുള്ള ചര്ച്ചകള് മാത്രമാണ് പുരോഗമിക്കുന്നതെന്നും ബിജു പ്രഭാകര് ആരോപിച്ചിരുന്നു. ഇതിനുപിന്നാലെയാണ് കെ എസ് ആര് ടി സി മാനേജിംഗ് ഡയറക്ടര്ക്കെതിരെ സിപിഐ സംസ്ഥാന സെക്രട്ടറി രംഗത്തെത്തിയത്.