ആലപ്പുഴ: ആലപ്പുഴയില്‍ സിപിഎം നേതാക്കള്‍ ലഹരിക്കടത്തുകേസില്‍ ഉള്‍പ്പെട്ട സംഭവത്തില്‍ പ്രതികരണവുമായി സിപിഎം പൊളിറ്റ് ബ്യൂറോ അംഗം എം എ ബേബി. ഉപ്പുതിന്നവര്‍ ആരായാലും വെളളം കുടിക്കും എന്നാണ് എം എ ബേബി പറയുന്നത്. ഒരുപാട് വൈകല്യങ്ങള്‍ നിലനില്‍ക്കുന്ന സമൂഹത്തിലാണ് പാര്‍ട്ടി പ്രവര്‍ത്തിക്കുന്നതെന്നും പാര്‍ട്ടിക്ക് നിരക്കാത്ത പ്രവര്‍ത്തന- ജീവിതശൈലിയുമായി ആര് മുന്നോട്ടുപോയാലും ശക്തമായ നടപടിയെടുക്കുമെന്നും എം എ ബേബി പറഞ്ഞു. ആലപ്പുഴ മാരാരിക്കുളത്ത് സിപിഎം ഭവന സന്ദര്‍ശന പരിപാടിയില്‍ സംസാരിക്കുകയായിരുന്നു അദ്ദേഹം.
'പാര്‍ട്ടിക്ക് നിരക്കാത്ത പ്രവര്‍ത്തനങ്ങളുമായി മുന്നോട്ടുപോയാല്‍ സിപിഎം അവര്‍ക്കെതിരെ കര്‍ശന നടപടി സ്വീകരിക്കും. വൈകല്യങ്ങള്‍ നിറഞ്ഞ സമൂഹത്തില്‍ ജീവിക്കുമ്പോള്‍ അത് പ്രവര്‍ത്തകരെയും ബാധിച്ചെന്ന് വരാം. അത് തെളിഞ്ഞാല്‍ തിരുത്തും. നിരോധിത പുകയില ഉല്‍പ്പന്നങ്ങളുമായി ബന്ധപ്പെട്ട് ജില്ലയില്‍ ഉയര്‍ന്ന ആരോപണങ്ങളില്‍ നടപടി ആരംഭിച്ചിട്ടുണ്ട്. നേതാക്കളെയും പാര്‍ട്ടിയെയുംകുറിച്ച് ജനങ്ങള്‍ ഉന്നയിക്കുന്ന വിമര്‍ശനങ്ങള്‍ സംസ്ഥാന കമ്മിറ്റിയെ അറിയിക്കും. പരാതികളെല്ലാം ഗൗരവമായാണ് കാണുന്നത്'- എം എ ബേബി പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
ആലപ്പുഴ ലഹരിക്കടത്തില്‍ പൊലീസ് പിടികൂടിയ ഏരിയാ കമ്മിറ്റി അംഗം എ ഷാനവാസിനെ പാര്‍ട്ടി അംഗത്വത്തില്‍നിന്ന് സസ്‌പെന്‍ഡ് ചെയ്തിരുന്നു. ഷാനവാസിന്റെ ലോറിയില്‍നിന്നാണ് ലഹരിവസ്തുക്കള്‍ പിടികൂടിയത്. സസ്‌പെന്‍ഡ് ചെയ്‌തെങ്കിലും ഷാനവാസ് ആലപ്പുഴ നഗരസഭ ക്ഷേമകാര്യ സ്ഥിരംസമിതി സ്ഥാനത്ത് തുടരുകയാണ്. ലോറിയുടെ ഡ്രൈവര്‍ ഇജാസ് സിപിഎം അംഗമായിരുന്നു. ഇയാളെയും പാര്‍ട്ടി പുറത്താക്കി. ഇജാസ് മുന്‍പും ലഹരിക്കടത്ത് നടത്തിയതായി കേസുണ്ട്.
