കൊച്ചി: മുഖ്യമന്ത്രിക്കെതിരായ കരിങ്കൊടി പ്രതിഷേധത്തിനിടെ കെ എസ് യു വനിതാ നേതാവിനോട് മോശമായി പെരുമാറിയെന്ന പരാതിയില് കളമശേരി സി ഐക്കെതിരെ അന്വേഷണത്തിന് ഉത്തരവ്. എറണാകുളം ഡിസിസി പ്രസിഡന്റ് മുഹമ്മദ് ഷിയാസിന്റെ പരാതിയിലാണ് നടപടി. സി ഐക്കെതിരെ അന്വേഷണം നടത്തി റിപ്പോര്ട്ട് സമര്പ്പിക്കാന് ഡിസിപി നിര്ദേശിച്ചു. തൃക്കാക്കര അസിസ്റ്റന്റ് കമ്മീഷണറാണ് അന്വേഷണം നടത്തി റിപ്പോര്ട്ട് സമര്പ്പിക്കേണ്ടത്. കെ എസ് യു എറണാകുളം ജില്ലാ സെക്രട്ടറി മിവാ ജോളിയെയാണ് പുരുഷ പൊലീസ് ഷര്ട്ടിന്റെ കോളറില് പിടിച്ച് വലിച്ചിഴച്ചത്.
ഇന്നലെ വൈകുന്നേരം മൂന്നുമണിയോടെയായിരുന്നു സംഭവം. കളമശേരിയില്വെച്ച് യൂത്ത് കോണ്ഗ്രസ് പ്രവര്ത്തകര് മുഖ്യമന്ത്രി പിണറായി വിജയനുനേരേ കരിങ്കൊടി കാണിച്ചു പ്രതിഷേധിച്ചു. അതിനിടെയാണ് മിവ ജോളി കരിങ്കൊടിയുമായി മുഖ്യമന്ത്രിയുടെ വാഹനത്തിനുനേരേ നീങ്ങിയത്. ഇതു തടയാനാണ് സി ഐ മിവയുടെ ഷര്ട്ടിന്റെ കോളറില് പിടിച്ചുവലിച്ചത്. സി ഐ തന്നോട് മോശമായി പെരുമാറിയെന്നും അസഭ്യം പറഞ്ഞെന്നുമാണ് മിവ ജോളി ആരോപിക്കുന്നത്.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
'മെഡിക്കല് കോളേജിലെ വ്യാജ ജനന സര്ട്ടിഫിക്കറ്റ് വിവാദത്തില് സൂപ്രണ്ടിനെതിരെ നടപടി ആവശ്യപ്പെട്ടായിരുന്നു പ്രതിഷേധം. യൂത്ത് കോണ്ഗ്രസ് പ്രവര്ത്തകര്ക്കൊപ്പം ഞാനും കരിങ്കൊടിയുമായി എത്തി. അവിടെ വനിതാ പൊലീസുണ്ടായിരുന്നില്ല. പുരുഷ പൊലീസാണ് എന്നെയും പിടിച്ചുമാറ്റാനെത്തിയത്. അദ്ദേഹം കോളറില് പിടിച്ചുവലിക്കുകയും മോശമായി പെരുമാറുകയും ചെയ്തു. അറസ്റ്റ് ചെയ്ത് നീക്കുന്ന സമയത്ത് വനിതാ പൊലീസ് എത്തിയെങ്കിലും സി ഐ വീണ്ടും അനാവശ്യമായി ഇടപെടുകയും എന്റെ തല ശക്തിയായി പിടിച്ച് അമര്ത്തി വാഹനത്തിലേക്ക് കയറ്റുകയും ചെയ്തു'- മിവ ജോളി പറഞ്ഞു.