കോഴിക്കോട്: മുഖ്യമന്ത്രി പിണറായി വിജയന്‍ പങ്കെടുക്കുന്ന പരിപാടിയില്‍ കറുത്ത വസ്ത്രത്തിന് വിലക്ക്. കോഴിക്കോട് മീഞ്ചന്ത ആര്‍ട്ട്‌സ് ആന്‍ഡ് സയന്‍സ് കോളേജിലെ പരിപാടിയില്‍ പങ്കെടുക്കാനെത്തുന്ന വിദ്യാര്‍ത്ഥികള്‍ കറുത്ത വസ്ത്രവും മാസ്‌കും ഒഴിവാക്കണമെന്നാണ് നിര്‍ദേശം. കോളേജ് പ്രിന്‍സിപ്പാളാണ് നിര്‍ദേശം പുറപ്പെടുവിച്ചത്. പ്രിന്‍സിപ്പാള്‍ വാക്കാലാണ് നിര്‍ദേശം നല്‍കിയതെന്നാണ് വിദ്യാര്‍ത്ഥികള്‍ പറയുന്നത്. കോളേജിലെ ജൈവ വൈവിദ്ധ്യ കോണ്‍ഗ്രസില്‍ പങ്കെടുക്കാനാണ് മുഖ്യമന്ത്രി എത്തുന്നത്.
കറുത്ത വസ്ത്രം ധരിച്ചെത്തുന്നവരെ പരിപാടി നടക്കുന്ന ഹാളിലേക്ക് കടത്തിവിടുന്നുണ്ടെന്നും വസ്ത്രവുമായി ബന്ധപ്പെട്ട് അത്തരം നിര്‍ദേശങ്ങള്‍ നല്‍കിയിട്ടില്ലെന്നും പൊലീസ് പറയുന്നു. അതേസമയം, മുഖ്യമന്ത്രിക്കെതിരെ പ്രതിഷേധിക്കാനെത്തിയ രണ്ട് കെ എസ് യു പ്രവര്‍ത്തകരെ പൊലീസ് കസ്റ്റഡിയിലെടുത്തു. കെഎസ് യു കോഴിക്കോട് ജില്ലാ വൈസ് പ്രസിഡന്റ് സൂരജ്, എലത്തൂര്‍ ബ്ലോക്ക് പ്രസിഡന്റ് രാഗിന്‍ എന്നിവരെയാണ് പൊലീസ് കസ്റ്റഡിയിലെടുത്തത്.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
കഴിഞ്ഞ ദിവസം മുഖ്യമന്ത്രിയുടെ പാലക്കാട് സന്ദര്‍ശനത്തിനുമുന്നോടിയായി പത്തിലേറേ യൂത്ത് കോണ്‍ഗ്രസ് പ്രവര്‍ത്തകരെ പൊലീസ് കരുതല്‍ തടങ്കലിലാക്കിയിരുന്നു. എന്നാല്‍ കനത്ത സുരക്ഷ മറികടന്ന് മുഖ്യമന്ത്രിക്കുനേരെ കരിങ്കൊടി പ്രതിഷേധമുണ്ടായി. ചാലിശേരിയില്‍വെച്ചായിരുന്നു യൂത്ത് കോണ്‍ഗ്രസ് പ്രവര്‍ത്തകര്‍ മുഖ്യമന്ത്രിക്കുനേരേ കരിങ്കൊടി കാണിച്ചത്. ഇവരെ പൊലീസ് അറസ്റ്റുചെയ്ത് നീക്കുകയായിരുന്നു.
