കൊറോണ വൈറസിന്റെ പേരിൽ ഭീതി പരത്തരുതെന്ന് മുഖ്യമന്ത്രി പിണറായി വിജയൻ. അതേസമയം എല്ലാവരും നല്ല ജാഗ്രത പുലർത്തണമെന്ന് മുഖ്യമന്ത്രി ആവശ്യപ്പെട്ടു. 'വൈറസ് മനുഷ്യരിൽനിന്ന് മനുഷ്യരിലേക്ക് പകരാന് തുടങ്ങിയതിനാല് എല്ലാവരും ജാഗ്രത പാലിക്കണം. വൈറസ് നേരത്തെ റിപ്പോർട്ട് ചെയ്തിട്ടുള്ള സ്ഥലങ്ങളിൽനിന്ന് വരുന്നവർ പരിശോധനയ്ക്ക് വിധേയരാവണം. അതിന് അവരെ ബന്ധപ്പെട്ടവർ പ്രേരിപ്പിക്കണം'- മുഖ്യമന്ത്രി പറഞ്ഞു.
സംസ്ഥാനത്തുള്ള നിരവധി പേർ രോഗബാധിത രാജ്യങ്ങളിൽ പഠിക്കുകയും ജോലി ചെയ്യുകയും ചെയ്യുന്നുണ്ട്. രോഗം റിപ്പോർട്ട് ചെയ്തപ്പോൾതന്നെ ആരോഗ്യ വകുപ്പ് ജാഗ്രതാ നിർദ്ദേശം നൽകിയിരുന്നു. ഒരാൾക്കാണ് ഇപ്പോൾ കൊറോണ വൈറസ് സ്ഥിരീകരിച്ചിരിക്കുന്നത്. ഇയാളുടെ ഒരു പരിശോധനാ റിപ്പോർട്ടുകൂടി വരാനുണ്ട്. ആവശ്യമായ തുടർ നടപടികൾ ആരോഗ്യ വകുപ്പ് കൈക്കൊള്ളുമെന്നും മുഖ്യമന്ത്രി പറഞ്ഞു.