ഡല്‍ഹി: കോണ്‍ഗ്രസ് നേതാവ് രാഹുല്‍ ഗാന്ധിക്കുപിന്നാലെ ബിഹാര്‍ ഉപമുഖ്യമന്ത്രി തേജസ്വി യാദവിനെതിരെ മാനനഷ്ടക്കേസ്. തട്ടിപ്പുകാര്‍ ഗുജറാത്തികളാണെങ്കില്‍ എല്ലാം പൊറുക്കപ്പെടുമെന്ന പരാമര്‍ശത്തില്‍ ഗുജറാത്തിലെ അഹമ്മദാബാദ് കോടതിയിലാണ് തേജസ്വിക്കെതിരെ കേസ് ഫയല്‍ ചെയ്തത്. 'രാജ്യത്തിന്റെ നിലവിലെ സാഹചര്യമനുസരിച്ച്, ബിസിനസുകാരായ കളളന്മാരും കൊളളക്കാരും ഗുജറാത്തികളാണെങ്കില്‍ അവരുടെ എല്ലാ പാപങ്ങളും പൊറുക്കപ്പെടും'- എന്നാണ് തേജസ്വി യാദവ് പറഞ്ഞത്.
ഒളിവില്‍ കഴിയുന്ന ഇന്ത്യന്‍ വ്യവസായി മെഹുല്‍ ചോക്‌സിക്കെതിരായ റെഡ് കോര്‍ണര്‍ നോട്ടീസ് ഇന്റര്‍പോള്‍ പിന്‍വലിച്ചതിനുപിന്നാലെയായിരുന്നു തേജസ്വിയുടെ പരാമര്‍ശം. ഇതിനെതിരെ വ്യവസായിയും സാമൂഹ്യപ്രവര്‍ത്തകനുമായ ഹരേഷ് മേത്ത എന്നയാളാണ് അഹമ്മദാബാദ് മെട്രോപൊളിറ്റന്‍ കോടതിയില്‍ പരാതി നല്‍കിയത്.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
ഗുജറാത്തികളുടെ വികാരം വ്രണപ്പെടുത്തുന്ന പരാമര്‍ശമാണ് തേജസ്വി നടത്തിയതെന്നും പരാമര്‍ശമുള്‍പ്പെട്ട വീഡിയോ സഹിതമാണ് പരാതി നല്‍കിയതെന്നും ഹരേഷ് മേത്ത പറഞ്ഞു. ഐപിസി 499, 500 വകുപ്പുകള്‍ പ്രകാരമാണ് തേജസ്വി യാദവിനെതിരെ കേസെടുത്തത്. മെയ് ഒന്നിനാണ് വാദം കേള്‍ക്കുക. ഹാജരാകാന്‍ ആവശ്യപ്പെട്ട് കോടതി തേജസ്വിക്ക് സമന്‍സ് അയച്ചിട്ടുണ്ട്.
