തിരുവനന്തപുരം: സംസ്ഥാന സര്ക്കാരിന്റെ സ്വപ്ന പദ്ധതിയായ കെ ഫോണിന്റെ ലോഞ്ചിംഗ് ജൂണ് അഞ്ചിന് നടക്കും. സംസ്ഥാനത്തെ 20 ലക്ഷത്തോളം വരുന്ന സാമ്പത്തികമായി പിന്നോക്കം നില്ക്കുന്ന കുടുംബങ്ങള്ക്ക് സൗജന്യമായും മറ്റുളളവര്ക്ക് മിതമായ നിരക്കിലും അതിവേഗ ഇന്റര്നെറ്റ് സൗകര്യം കെ ഫോണ് മുഖേന ലഭ്യമാകുമെന്ന് മുഖ്യമന്ത്രി പിണറായി വിജയന് പറഞ്ഞു. നിലവില് 1800 ഓളം സര്ക്കാര് സ്ഥാപനങ്ങളില് കെ ഫോണ് മുഖേന ഇന്റര്നെറ്റ് സൗകര്യം ലഭ്യമാക്കിക്കഴിഞ്ഞെന്നും ഏഴായിരം വീടുകളില് കണക്ഷന് ലഭ്യമാക്കാനുളള അടിസ്ഥാന സൗകര്യങ്ങള് പൂര്ത്തീകരിച്ചിട്ടുണ്ടെന്നും മുഖ്യമന്ത്രി പറഞ്ഞു.
'ഇന്റര്നെറ്റ് ജനതയുടെ അവകാശമായി പ്രഖ്യാപിച്ച ഗവണ്മെന്റാണ് കേരളത്തിലുളളത്. മാറുന്ന ലോകത്തിനൊപ്പം മുന്നോട്ടുകുതിക്കാന് സാര്വ്വത്രികമായ ഇന്റര്നെറ്റ് സൗകര്യം അനിവാര്യമാണ്. ജ്ഞാന സമ്പദ് വ്യവസ്ഥയില് ഊന്നുന്ന നവകേരള നിര്മ്മിതിക്കായുളള പരിശ്രമത്തിന് അടിത്തറയൊരുക്കുന്ന പദ്ധതിയായി കെ ഫോണ് മാറും'- മുഖ്യമന്ത്രി പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
കെ ഫോണ് പദ്ധതി ടെലികോം മേഖലയിലെ കോര്പ്പറേറ്റ് ശക്തികള്ക്കെതിരായ ഇടതുസര്ക്കാരിന്റെ ജനകീയ ബദല്കൂടിയാണെന്നും സ്വകാര്യ കേബിള് ശ്യംഗലയുടെയും മൊബൈല് സേവനദാതാക്കളുടെയും ചൂഷണത്തിന് അവസരമൊരുക്കരുതെന്ന നിശ്ചയദാര്ഢ്യത്തോടെയാണ് സംസ്ഥാന സര്ക്കാര് കെ ഫോണ് പദ്ധതിക്ക് തുടക്കമിട്ടതെന്നും മുഖ്യമന്ത്രി പറഞ്ഞു. വൈദ്യുതി- ഐടി വകുപ്പുകള് വഴി എല്ഡിഎഫ് സര്ക്കാര് വിഭാവനം ചെയ്യുന്ന കെ ഫോണ് പദ്ധതി സമൂഹത്തിലുണ്ടാകുന്ന ഡിജിറ്റല് ഡിവൈഡ് മറികടക്കാന് സഹായിക്കുമെന്നും അദ്ദേഹം കൂട്ടിച്ചേര്ത്തു.