തിരുവനന്തപുരം: സംസ്ഥാനത്ത് ഇന്ന് അര്ത്ഥരാത്രി മുതല് ട്രോളിംഗ് നിരോധനം. ജൂലൈയ് 31 അര്ധരാത്രി വരെ 52 ദിവസമാണ് ട്രോളിംഗ് നിരോധനം. മാസങ്ങളായി കടലിലായിരുന്ന വലിയ ബോട്ടുകള് ഇന്നലെ മുതല് തിരികെ വന്നുതുടങ്ങി. ട്രോളിംഗ് നിരോധനമുളള സമയത്ത് യന്ത്രവല്കൃത ബോട്ടുകള് കടലില് പോകാനോ മത്സ്യബന്ധനം നടത്താനോ പാടില്ല. പരമ്പരാഗത മത്സ്യത്തൊഴിലാളി വളളങ്ങള്ക്കുമാത്രമാണ് കടലില് പോകാന് അനുമതി. എന്നാല് ജൂണ്- ജൂലൈ മാസങ്ങളിലെ ട്രോളിംഗ് നിരോധനം അശാസ്ത്രീയമാണ് എന്നാണ് മത്സ്യത്തൊഴിലാളികള് പറയുന്നത്. പരീക്ഷണാടിസ്ഥാനത്തില് ആരംഭിച്ച ട്രോളിംഗ് നിരോധനം വേണ്ടത്ര പഠനം നടത്താതെ തുടരുന്നതില് ബോട്ടുടമകള്ക്കും എതിര്പ്പുണ്ട്.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
അതേസമയം, കാലവര്ഷം എത്തിയതോടെ സംസ്ഥാനത്ത് മഴ കനത്തു. എട്ട് ജില്ലകളില് ശക്തമായ മഴയ്ക്ക് സാധ്യതയുളളതിനാല് യെല്ലോ അലര്ട്ട് പ്രഖ്യാപിച്ചിട്ടുണ്ട്. തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, കോഴിക്കോട്, കണ്ണൂര് ജില്ലകളിലാണ് മുന്നറിയിപ്പുളളത്. പതിവില്നിന്ന് എട്ടുദിവസം വൈകിയാണ് ഇത്തവണ സംസ്ഥാനത്ത് കാലവര്ഷമെത്തിയത്. അതിതീവ്രമായി മാറിയ ബിപോര്ജോയ് ചുഴലിക്കാറ്റ് അറബിക്കടലിന്റെ വടക്കുപടിഞ്ഞാറന് ദിശയില് തുടരുകയാണ്. കേരളാ-കര്ണാടക തീരങ്ങളില് മത്സ്യബന്ധനത്തിന് വിലക്കുണ്ട്.