മുംബൈ: ഉഭയ സമ്മതപ്രകാരമുള്ള ലൈംഗിക ബന്ധത്തിന് നിശ്ചയിച്ച പ്രായം കുറയ്ക്കുന്നതിനെ കുറിച്ച് ആലോചിക്കേണ്ടതുണ്ടെന്ന് മുംബൈ ഹൈക്കോടതി. ഇതില്‍ പല രാജ്യങ്ങളും കുറവ് വരുത്തിയിട്ടുണ്ട് എന്നും ലോകത്ത് നടക്കുന്ന കാര്യങ്ങള്‍ നാം ശ്രദ്ധിക്കേണ്ടതുണ്ട് എന്നും കോടതി അഭിപ്രായപ്പെട്ടു. ലൈംഗിക അതിക്രമങ്ങളില്‍ നിന്ന് രക്ഷനേടാനുള്ള അവകാശം പോലെ ലൈംഗിക ബന്ധത്തില്‍ ഏര്‍പ്പെടാനുള്ള കൌമാര പ്രായക്കാരുടെ ആവശ്യവും ഒരുപോലെ പരിഗണിക്കപ്പെടേണ്ടതുണ്ട്- ജസ്‌റ്റിസ് ഭാരതി ഡാംഗ്രെ പറഞ്ഞു.
ലൈംഗിക അതിക്രമ കേസില്‍ യുവാവിനെ കുറ്റവിമുക്തനാക്കിക്കൊണ്ടുള്ള വിധി പ്രഖ്യാപനത്തിനിടെയായിരുന്നു ജഡ്ജിയുടെ പരാമര്‍ശം. നാലുവര്‍ഷം മുന്‍പ് ലൈംഗികാതിക്രമവുമായി ബന്ധപ്പെട്ട കേസില്‍ പെട്ട 25 കാരനെ കോടതി കുറ്റവിമുക്തനാക്കി. പരസ്പര സമ്മതത്തോടെയാണ് ബന്ധത്തില്‍ ഏര്‍പ്പെട്ടത് എന്ന 17 കാരിയുടെ മൊഴിയുടെ അടിസ്ഥാനത്തിലാണ് കോടതിയുടെ നടപടി. വിവാഹപ്രായവും ലൈംഗിക ബന്ധത്തിനുള്ള അവകാശവും വേര്‍തിരിച്ചു കാണേണ്ടതുണ്ട്- കോടതി പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
രാജ്യത്ത് 2012 വരെ ലൈംഗിക ബന്ധത്തിനുള്ള മിനിമം പ്രായം പതിനാറ് വയസ്സായിരുന്നു. പോക്സോ നിയമമാണ് പ്രായ പരിധി 18 ആക്കി ഉയര്‍ത്തിയത്. പല വിദേശ രാജ്യങ്ങളിലും ഇത് 14 മുതല്‍ 16 വരെ വയസ്സാണ്. ലൈംഗികത വിവാഹത്തിന്റെ പരിധിയില്‍ പരിഗണിക്കപ്പെടേണ്ട കാര്യമല്ല. ഇക്കാര്യം രാജ്യത്തെ നീതിന്യായ സംവിധാനവും സമൂഹവും ഗൌരവമായി എടുക്കേണ്ടതുണ്ട്‌ എന്നും കോടതി അഭിപ്രായപ്പെട്ടു.
