തിരുവനന്തപുരം: സംസ്ഥാനത്ത് 10 വര്‍ഷമായി മുടങ്ങിക്കിടക്കുന്ന നദീമണല്‍ വാരല്‍ മാര്‍ച്ചില്‍ പുനരാരംഭിക്കും. ഇന്നലെ ചേര്‍ന്ന റവന്യൂ സെക്രട്ടറിയേറ്റിലാണ് ഇതുസംബന്ധിച്ച തീരുമാനമുണ്ടായത്. മണല്‍ വാരലിനുളള പ്രത്യേക മാര്‍ഗനിര്‍ദേശങ്ങള്‍ ഉടന്‍ പുറത്തിറക്കും. മലപ്പുറം ജില്ലയിലെ മൂന്ന് കടവുകളിലാണ് മാര്‍ച്ച് അവസാനത്തോടെ മണല്‍ വാരല്‍ ആരംഭിക്കുക. ഈ വര്‍ഷം തന്നെ എല്ലാ നദികളിലെയും മണല്‍ വാരല്‍ ആരംഭിക്കുകയാണ് ലക്ഷ്യമെന്ന് മന്ത്രി കെ രാജന്‍ പറഞ്ഞു.
ദേശീയ ഹരിത ട്രൈബ്യൂണലിന്റെ നിര്‍ദേശം അനുസരിച്ച് നാഷണല്‍ ഇന്‍സ്റ്റിറ്റ്യൂട്ട് ഫോര്‍ ഇന്റര്‍ ഡിസിപ്ലിനറി സയന്‍സ് ആന്‍ഡ് ടെക്‌നോളജി അംഗീകൃത ഏജന്‍സിയുടെ ജില്ലാതല സര്‍വ്വേ റിപ്പോര്‍ട്ടിന്റെ അടിസ്ഥാനത്തിലാണ് തീരുമാനം. 11 ജില്ലകളിലെ സര്‍വ്വേ റിപ്പോര്‍ട്ടാണ് ലഭിച്ചത്. അതുപ്രകാരം ആകെ 67 കടവുകളിലാണ് കൂടുതല്‍ മണല്‍ശേഖരം ഉള്ളത്.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
ഹരിത ട്രൈബ്യുണലിന്റെ ഉത്തരവിലെ നടപടിക്രമങ്ങള്‍ അനുസരിച്ച് 5 ഹെക്ടറില്‍ താഴെ പ്രദേശത്തുമാത്രമേ മണല്‍ വാരാന്‍ അനുവാദമുളളു. മണല്‍ ഖനനത്തിന് അനുവാദമില്ല. വാരുന്ന മണല്‍ മുന്‍പേ രൂപീകരിച്ചിട്ടുളള കടവ് കമ്മിറ്റികള്‍ വഴിയാകും വിതരണം ചെയ്യുക. കോടതി വിധിയെ തുടര്‍ന്നാണ് 10 വര്‍ഷം മുന്‍പ് കേരളത്തില്‍ നദികളില്‍ നിന്നുളള മണല്‍വാരല്‍ നിരോധിച്ചത്.
