തിരുവനന്തപുരം: സംസ്ഥാന ബജറ്റിനെ പ്രതിപക്ഷത്തെ വിമര്‍ശിക്കാനുളള ഡോക്യുമെന്റാക്കി മാറ്റി തരംതാഴ്ത്തിയെന്ന് പ്രതിപക്ഷ നേതാവ് വി ഡി സതീശന്‍. രാഷ്ട്രീയ ആരോപണങ്ങളും രാഷ്ട്രീയ പ്രഖ്യാപനങ്ങളും നടത്തി ബജറ്റിന്റെ നിലവാരം കെടുത്തിയെന്നും യാഥാര്‍ത്ഥ്യ ബോധമില്ലാത്ത പ്രഖ്യാപനങ്ങളാണ് നടത്തിയതെന്നും വി ഡി സതീശന്‍ ആരോപിച്ചു. കാര്‍ഷിക മേഖലയെ നിരാശപ്പെടുത്തുന്ന ബജറ്റാണിതെന്നും നയാപ്പൈസ കയ്യിലില്ലാതെ ജനങ്ങളെ പറ്റിക്കുകയാണെന്നും അദ്ദേഹം സഭയില്‍ കുറ്റപ്പെടുത്തി.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
'ലൈഫ് മിഷന്‍ കഴിഞ്ഞ ബജറ്റില്‍ പ്രഖ്യാപിച്ചതിന്റെ മൂന്ന് ശതമാനം മാത്രമാണ് ചെലവാക്കിയത്. ഉമ്മന്‍ചാണ്ടി സര്‍ക്കാര്‍ കൊണ്ടുവന്ന വിഴിഞ്ഞം പദ്ധതിയെക്കുറിച്ചായിരുന്നു കൂടുതല്‍ പരാമര്‍ശം. കാര്‍ഷിക മേഖലയെ നിരാശപ്പെടുത്തുന്ന ബജറ്റാണിത്. റബ്ബര്‍ കര്‍ഷകരെ പരിഹസിക്കുന്ന ബജറ്റ്. താങ്ങുവില 10 രൂപ വര്‍ധിപ്പിച്ച് റബ്ബര്‍ കര്‍ഷകരെ അപമാനിക്കുകയാണ് ചെയ്തത്. മൂന്നുവര്‍ഷം കൊണ്ട് റബ്ബറിന് കൂട്ടിയത് 10 രൂപ മാത്രമാണ്. എല്‍ഡിഎഫ് പ്രകടനപത്രികയില്‍ 250 ആയി ഉയര്‍ത്തുമെന്നായിരുന്നു പ്രഖ്യാപനം. വിശ്വാസ്യതയില്ലാത്ത ബജറ്റാണ് അവതരിപ്പിച്ചത്'- വി ഡി സതീശന്‍ പറഞ്ഞു.
പരിതാപകരമായ ധനസ്ഥിതി മറച്ചുവയ്ക്കാനാണ് ബജറ്റിലൂടെ ശ്രമിച്ചതെന്നും സര്‍ക്കാരിന്റെ കയ്യില്‍ നയാപൈസയില്ലെന്നും അദ്ദേഹം കൂട്ടിച്ചേര്‍ത്തു.
