തിരുവനന്തപുരം: സംസ്ഥാന സര്‍ക്കാരിന്റെ ചിലവില്‍ ലഘുലേഖ അടിച്ച് സിപിഎം ഭവന സന്ദര്‍ശനം നടത്തുന്നതായി മുന്‍ മുഖ്യമന്ത്രി ഉമ്മന്‍ ചാണ്ടി ആരോപിച്ചു. സര്‍ക്കാര്‍ നേട്ടങ്ങള്‍ വിശദീകരിച്ചുകൊണ്ട് രണ്ടു ദിവസം മുന്പാണ് പാര്‍ട്ടി തലത്തില്‍ ഭവന സന്ദര്‍ശനം ആരംഭിച്ചത്. ഇതിനായി സംസ്ഥാന ഖജനാവില്‍ നിന്ന് രണ്ടരക്കോടി രൂപ ചിലവിട്ട് 75 ലക്ഷം ലഘുലേഖകള്‍ അടിച്ചിറക്കിയതായി ഉമ്മന്‍ ചാണ്ടി ആരോപിച്ചു.
സുഭിക്ഷം, ഭദ്രം, സുരക്ഷിതം എന്ന തലക്കെട്ടിലാണ് ലഘുലേഖകള്‍ ഇറക്കിയതെന്നും ഇത് സര്‍ക്കാര്‍ ചിലവിലാണ് അച്ചടിച്ചതെന്നും മുന്‍ മുഖ്യമന്ത്രി ആരോപിച്ചു.
