ആം ആദ്മി പാർട്ടി എംഎൽഎക്കു നേരെയുണ്ടായ വെടിവെപ്പിൽ ഒരാൾ മരിച്ചു. ആം ആദ്മി പാർട്ടി പ്രവർത്തകനായ അശോക് മൻ (45) ആണ് മരിച്ചത്. ഇയാളുടെ ബന്ധു ഹരേന്ദറിന് അക്രമത്തിൽ ഗുരുതരമായി പരുക്കേറ്റിട്ടുണ്ട്. ചൊവ്വാഴ്ച രാത്രിയാണ് മെഹ്റോളി എംഎൽഎ നരേഷ് യാദവിനും സംഘത്തിനും നേരെ വെടിവെപ്പുണ്ടായത്.
അക്രമി ഏഴ് റൗണ്ട് വെടിവെച്ചു. മെഹ്‌റോളിയിൽ ക്ഷേത്ര ദർശനം കഴിഞ്ഞ്‌ മടങ്ങുമ്പോൾ കിഷൻഗഡിന് സമീപമാണ് എംഎൽഎയ്‌ക്കും സംഘത്തിനും നേരെ വെടിവെപ്പുണ്ടായത്. സ്ഥലത്തു നിന്നും വെടിയുണ്ടകളുടെ ഷെൽ കണ്ടെടുത്തിട്ടുണ്ട്.
അതേസമയം അക്രമിയുടെ ലക്ഷ്യം നരേഷ് യാദവ് ആയിരുന്നില്ലെന്ന് സൗത്ത് വെസ്റ്റ് ഡൽഹി അസിസ്റ്റന്റ് ഡിസിപി ഇംഗിത് പ്രതാപ് സിംഗ് വ്യക്തമാക്കി. അശോക് മന്നിന് എതിരെയായിരുന്നു അക്രമമെന്നും ഡിസിപി അറിയിച്ചു. സംഭവത്തിൽ ഒരാളെ പോലീസ് കസ്റ്റഡിയിൽ എടുത്തിട്ടുണ്ട്. മെഹ്റോളി മണ്ഡലത്തിൽ നിന്നും 18161 വോട്ടുകൾക്കാണ് നരേഷ് യാദവ് ജയിച്ചത്. ബിജെപി സ്ഥാനാർത്ഥി കുസും ഖത്രിയെയാണ് പരാജയപ്പെടുത്തിയത്.
