തിരുവനന്തപുരത്ത് കീം പരീക്ഷ എഴുതിയ രണ്ട് വിദ്യാർത്ഥികൾക്ക് കൊവിഡ് സ്ഥിരീകരിച്ചു. തൈക്കാട് കേന്ദ്രത്തിൽ പരീക്ഷ എഴുതിയ വിദ്യാർത്ഥികൾക്കാണ് കൊവിഡ്. ഇതിൽ ഒരു കുട്ടിക്ക് രോഗ ലക്ഷണം ഉള്ളതിനാൽ പ്രത്യേക മുറിയിൽ ഇരുന്നാണ് പരീക്ഷ എഴുതിയത്. അതേ സമയം രണ്ടാമത്തെ വിദ്യാർത്ഥി മറ്റ് കുട്ടികൾക്ക് ഒപ്പമാണ് ഇരുന്നത്. ഈ ക്ലാസിൽ പരീക്ഷ എഴുതിയ കുട്ടികളോട് ക്വാറന്റീനിൽ പോകാൻ ആവശ്യപ്പെട്ടിട്ടുണ്ട്. പരീക്ഷ എഴുതിയ വിദ്യാർത്ഥികളുടെ പൂർണ വിവരങ്ങൾ അധികൃതരുടെ കൈവശമുള്ളതിനാൽ സമ്പർക്കപ്പട്ടിക സങ്കീർണമാവില്ല. വിദ്യാർത്ഥികൾ തമ്മിൽ സാമൂഹ്യ അകലം പാലിച്ചതിനാൽ പ്രശ്നം ഗുരുതരമാവില്ലെന്നാണ് ആരോഗ്യ വകുപ്പിന്റെ നിഗമനം. തിരുവനന്തപുരം ജില്ലയിൽ ഇന്നലെ മാത്രം 182 പേർക്കാണ് രോഗം സ്ഥിരീകരിച്ചത്.
തിരുവനന്തപുരം മെഡിക്കൽ കോളേജിൽ സ്ഥിതിഗതികൾ ഗുരതരമായി തുടരുകയാണ്. മെഡിക്കൽ കോളേജിൽ 17 ജീവനക്കാർക്ക് കൊവിഡ് ബാധിച്ചു. രോഗം ബാധിച്ചവരിൽ 7 പേർ ഡോക്ടർമാരാണ്. ഇവരുമായി സമ്പർക്കത്തിലുള്ള 150 ഓളം ജീവനക്കാർ നിരീക്ഷണത്തിലാണ്. കൊവിഡ് ഡ്യൂട്ടി എടുക്കാത്തവർക്കും രോഗം സ്ഥിരീകരിച്ചിട്ടുണ്ട്. നോൺ കൊവിഡ് ഏരിയയിൽ ജോലി ചെയ്തവർക്കാണ് രോഗം. മെഡിക്കൽ കോളേജിലെ മുഴുവൻ പ്രവർത്തനങ്ങളെയും ബാധിക്കുന്ന ഗുരുതരമായ സാഹചര്യമാണുള്ളതാണെന്നാണ് വിലയിരുത്തൽ. ജനറൽ ഡ്യൂട്ടി എടുത്തവർക്ക് കൊവിഡ് ബാധിച്ചത് ജീവനക്കാരിൽ കടുത്ത ആശങ്കയുണ്ടാക്കിയിട്ടുണ്ട്. മെഡിക്കൽ കോളേജിനെ പൂർണമായും കൊവിഡ് ആശുപത്രിയാക്കി ഇതര അസുഖമുള്ളവരെ പ്രവരേശിപ്പിക്കരുതെന്ന് ആരോഗ്യ പ്രവർത്തകർ ആവശ്യം ഉന്നയിച്ചിട്ടുണ്ട്.
തിരുവനന്തപുരത്തെ തീരദേശ മേഖലയിൽ സമ്പൂർണ ലോക്ഡൗൺ രണ്ടാഴ്ചത്തേക്ക് കൂടി ദീർഘിപ്പിച്ചിരിക്കുകയാണ്. പൂർണമായും അടച്ചിടാനാണ് സർക്കാർ തീരുമാനിച്ചത്. നഗര പ്രദേശവും തീര പ്രദേശവും തമ്മിലുളള റോഡ് ഗതാഗതം പൂർണമായും അടക്കും. തീരപ്രദേശത്തുള്ളവരെ നഗരത്തിലേക്കോ നഗരത്തിലുള്ളവരെ തീരത്തേക്കോ പ്രവേശിപ്പിക്കല്ല. തീരദേശത്തെ ജീവതം സുഗമമാക്കാൻ പ്രത്യേക സംവിധാനങ്ങൾ ഒരുക്കും. തീരദേശത്തുള്ളവരെ പരമാവധി വീട്ടിൽ ഇരുത്തി സമ്പർക്ക വ്യാപനം ഒഴിവാക്കുകയാണ് സർക്കാറിന്റെ ലക്ഷ്യം. ജനസാന്ദ്രത കൂടുതലുള്ള പ്രദേശങ്ങളിൽ നിരീക്ഷണവും നിയന്ത്രണവും കർശനമാക്കും. രോഗ വ്യാപനം കൂടുതലുള്ള പ്രദേശങ്ങളിൽ പ്രത്യേക പ്രതിരോധ പ്രവർത്തനങ്ങൾ ഏർപ്പെടുത്തും.