തിരുവനന്തപുരത്ത് സംസ്ഥാന ജയിൽ ആസ്ഥാനം അടച്ചു. രണ്ട് തടവുകാർക്ക് കൊവിഡ് സ്ഥിരീകരിച്ച സാഹചര്യത്തിലാണ് ആസ്ഥാനം അടക്കാൻ തീരുമാനിച്ചത്. ആസ്ഥാനം ശുചീകരിക്കാൻ ഇരുവരും എത്തിയിരുന്നു. തുടർന്ന് ജയിൽ ഡിജിപിയാണ് ആസ്ഥാനം അടച്ചിടാൻ നിർദ്ദേശിച്ചത്. 3 ദിവനത്തിന് ശേഷം ആസ്ഥാനം തുറക്കും. ഇതിനിടെ ശുചീകരണ പ്രവൃത്തികൾ ഇവിടെ നടക്കും.
പൂജപ്പുര ജയിലിൽ കൊവിഡ് ബാധിതരുടെ എണ്ണം 101 ആയി. കഴിഞ്ഞ ദിവസം 41 പേർക്ക് കൂടി കൊവിഡ് ബാധ കണ്ടെത്തിയിരുന്നു. തടവുകാർക്കും ഉദ്യോഗസ്ഥർക്കുമാണ് കൊവിഡ് സ്ഥിരീകരിച്ചത്. അസുഖബാധിതരെ പ്രത്യേക കെട്ടിടത്തിലേക്ക് മാറ്റിയിട്ടുണ്ട്. ഇവരിൽ ഭൂരിഭാഗത്തിനും രോഗ ലക്ഷണങ്ങൾ ഇല്ല. രോഗ ബാധയുടെ ഉറവിടം ഇതുവരെ കണ്ടെത്തിയിട്ടില്ല. ആകെ ആയിരത്തോളം തടവുകരാണ് പൂജപ്പുര സെൻട്രൽ ജയിലിലുള്ളത്. ജയിലിൽ കൊവിഡ് ബാധിച്ചത് ഏറെ ആശങ്കയോടെയാണ് ആഭ്യന്തര വകുപ്പ് കാണുന്നത്. രോഗ വ്യാപനം പിടിച്ചു നിർത്താൻ അടിയന്തരമായി ഇടപെടാൻ ആരോഗ്യ വകുപ്പിനോടും ജില്ലാ ഭരണകൂടത്തിനോടും ആവശ്യപ്പെട്ടിട്ടുണ്ട്.
