ഗോവ മുഖ്യമന്ത്രി പ്രമോദ് സാമന്തിന് കൊവിഡ് സ്ഥിരീകരിച്ചു. വീട്ടിൽ തന്നെയാണ് സാമന്ത് ചികിത്സയിലുള്ളത്. സാമന്തിന് രോഗലക്ഷണങ്ങൾ ഇല്ല.കൊവിഡ് സ്ഥിരീകരിച്ചത് സാമന്ത് തന്നെയാണ് അറിയിച്ചത്. ട്വിറ്ററിലൂടെയാണ് വിവരം മുഖ്യമന്ത്രി പുറത്തുവിട്ടത്. താനുമായി നേരിട്ട് ബന്ധപ്പെട്ടവർ മുൻകരുതൽ എടുക്കണമെന്നും അദ്ദേഹം ട്വിറ്ററിൽ നിർദ്ദേശിച്ചു. സാമന്തുമായി മന്ത്രിസഭയിലെ നിരവധി പേർ നേരിട്ട ബന്ധപ്പെട്ടിട്ടുണ്ട്. മന്ത്രിമാർ ഉൾപ്പെടെ നിരവധി പേർ നിരീക്ഷണത്തിൽ പോയിട്ടുണ്ട്. രോഗം സ്ഥിരീക്കരിക്കുന്നതിന് തൊട്ടുമുമ്പ് ഗോവയിലെ ആരോഗ്യമന്ത്രിയും റവന്യു മന്ത്രിയും മുഖ്യമന്ത്രിയുമായി കൂടിക്കാഴ്ച നടത്തിയിരുന്നു.
കർണാടക മുഖ്യമന്ത്രി യെദ്യൂരപ്പ, മധ്യപ്രദേശ് മുഖ്യമന്ത്രി ശിവരാജ് ചൗഹാൻ, ഹരിയാന മുഖ്യമന്ത്രി മനോഹർ ലാൽ ഖട്ടർ എന്നിവർക്കും കൊവിഡ് സ്ഥിരീകരിച്ചിരുന്നു. മുഖ്യമന്ത്രി പിണറായി വിജയൻ , തമിഴ് നാട് മുഖ്യമന്ത്രി, ഡൽഹി മുഖ്യമന്ത്രി എന്നിവർ കൊവിഡ് സംശയത്തെ തുടർന്ന് നിരീക്ഷണത്തിൽ പോയിരുന്നു.