ചാണകത്തിന് അണുപ്രസരണം തടുക്കാനുള്ള ശക്തിയുണ്ടെന്ന് രാഷ്ട്രീയ കാമധേനു ആയോഗ് ചെയർമാൻ വല്ലഭഭായ് കത്തിരിയ. ഇത് ശാസ്ത്രീയപരമായി തെളിയിക്കപ്പെട്ടിട്ടുണ്ടെന്നും അദ്ദേഹം പറഞ്ഞു. ചാണകം കൊണ്ട് നിർമിച്ച മൊബൈൽ ഫോൺ ചിപ്പും കത്തിരിയ മാധ്യമങ്ങളെ പരിചയപ്പെടുത്തി.
ചാണകത്തിന്റെ അണുപ്രസരണ വിരുദ്ധ സ്വഭാവം കാരണം ചാണകത്തിൽ നിന്നും നിർമിച്ച ചിപ്പുകൾ മൊബൈൽ ഫോണുകളിൽ ഘടിപ്പിക്കുന്നതിലൂടെ ജനങ്ങളെ അണുപ്രസരണത്തില്‍ നിന്നും സംരക്ഷിക്കാന്‍ കഴിയുമെന്ന് കത്തിരിയ മാധ്യമങ്ങളോട് പറഞ്ഞു. 'ഗോസത്ത്വ കവച്' എന്നാണ് ചിപ്പിന് പേരിട്ടിരിക്കുന്നത്. ഗുജറാത്തിലുള്ള ഒരു ഗോശാലയാണ് ചിപ്പ് നിർമിച്ചത്. വീടുകളിൽ ചാണകം കൊണ്ട് നിർമിച്ച ഉൽപ്പന്നങ്ങൾ സൂക്ഷിക്കണമെന്നും അദ്ദേഹം അഭിപ്രായപ്പെട്ടു. ഇതിലൂടെ അണുപ്രസരണം കാരണം ഉണ്ടാകുന്ന രോഗങ്ങളിൽ നിന്നും രക്ഷനേടാമെന്നും കത്തിരിയ പറഞ്ഞു. ആരോഗ്യ സംരക്ഷണത്തിനായി നടൻ അക്ഷയ് കുമാർ സ്ഥിരമായി ഗോമൂത്രം കുടിക്കാറുണ്ടെന്നും ചാണകം കഴിക്കാറുണ്ടെന്നും കത്തിരിയ മാധ്യമങ്ങളോട് പറഞ്ഞു. താൻ ദിവസവും രാവിലെ ഗോമൂത്രം കുടിക്കാറുണ്ടെന്ന് നടൻ കഴിഞ്ഞ ദിവസം പറഞ്ഞിരുന്നു.
കേന്ദ്ര മൃഗസംരക്ഷണ വകുപ്പിന് കീഴിൽ പ്രവർത്തിക്കുന്ന സ്ഥാപനമാണ് രാഷ്ട്രീയ കാമധേനു ആയോഗ്. രാജ്യത്തെ ഗോസംരക്ഷണം ഉറപ്പുവരുത്തനായി നിർമിച്ച സ്ഥാപനമാണ് ഇത്.
