ഡൽഹിയിൽ കളിച്ചാൽ കേന്ദ്രമന്ത്രിമാരെ കേരളത്തിൽ കാലുകുത്താൻ സമ്മതിക്കില്ലെന്ന് കെ. മുരളീധരൻ എംപി. ഒരു കേന്ദ്രമന്ത്രിമാരേയും കേരളത്തിൽ കാലുകുത്തിക്കില്ല, വി.മുരളീധരന് പോലും സഞ്ചരിക്കാനാകാത്ത സ്ഥിതി വരുമെന്നും അദ്ദേഹം മുന്നറിയിപ്പ് നല്‍കി. 'ചാനലുകൾക്ക് സംപ്രേഷണ വിലക്ക് ഏര്‍പ്പെടുത്തിയ നടപടിയിൽ വി. മുരളീധരൻ രാജാവിനേക്കാൾ വലിയ രാജഭക്തി കാട്ടുകയാണ്. കേന്ദ്ര വാര്‍ത്താ വിതരണ പ്രക്ഷേപണ വകുപ്പ് മന്ത്രി പറയുന്നതല്ല അദ്ദേഹം പറയുന്നത്. എന്തും പറയാമെന്ന് വി. മുരളീധരൻ കരുതരുതെന്നും' കെ. മുരളീധരൻ പറഞ്ഞു.
പ്രധാനമന്ത്രിയുടെ അറിവോടെയുള്ള ആസൂത്രിത അക്രമമാണ് ഡല്‍ഹിയില്‍ നടന്നതെന്നും മുരളീധരന് ആരോപിച്ചു. അറിഞ്ഞോ അറിയാതെയോ കെജ്രിവാളും അതിൻ്റെ ഭാഗമായി, സംഘർഷ സ്ഥലത്ത് പോകാൻ പോലും കെജ്രിവാൾ തയ്യാറാകാത്തതിനേയും അദ്ദേഹം വിമര്‍ശിച്ചു.
