കോട്ടയം: ശബരിമല വിഷയം പറഞ്ഞ് ബിജെപി ജനങ്ങളെ വഞ്ചിക്കുകയാണെന്ന് ആരോഗ്യ മന്ത്രി കെ.കെ ശൈലജ. ശബരിമലയില്‍ സര്‍ക്കാര്‍ കോടതി വിധി നടപ്പാക്കുക മാത്രമാണ് ചെയ്തത്. അതിനെ വളച്ചൊടിച്ച് വോട്ടാക്കി മാറ്റാനുള്ള ശ്രമമാണ് ബിജെപിയുടെ ഭാഗത്ത് നിന്ന് ഉണ്ടാകുന്നത്.
തെരഞ്ഞെടുപ്പിനോട് അനുബന്ധിച്ച് കൊവിഡ്‌ കേസുകള്‍ കൂടാന്‍ സാധ്യതയുണ്ടെന്നും കെ.കെ ശൈലജ പറഞ്ഞു. വേണ്ട മുന്‍കരുതലുകള്‍ എടുക്കുന്നുണ്ടെന്നും അതിനാല്‍ വലിയ ഒരു രോഗവ്യാപനം ഉണ്ടാകാന്‍ സാധ്യതയില്ലെന്നും മന്ത്രി വ്യക്തമാക്കി.
കഴക്കൂട്ടത്തെ സിപിഎം സ്ഥാനാര്‍ഥിയും, ദേവസ്വം മന്ത്രിയുമായ കടകംപള്ളി സുരേന്ദ്രനെതിരെ ശോഭ സുരേന്ദ്രന്‍ നടത്തിയ പൂതന പ്രയോഗമാണ് വിവാദങ്ങള്‍ക്ക് തുടക്കമിട്ടത്. അയ്യപ്പ വിശ്വാസികളെ തകര്‍ക്കാന്‍ വന്ന പൂതനയാണ്‌ കടകംപള്ളി സുരേന്ദ്രന്‍ എന്നായിരുന്നു ബിജെപി സ്ഥാനാര്‍ഥി ശോഭ സുരേന്ദ്രന്‍ പറഞ്ഞത്.
