ഗുഡ്സ് ട്രെയിനിന്റെ മുകളിൽ കയറി സെൽഫിയെടുക്കാൻ ശ്രമിച്ച 16 കാരൻ വൈദ്യുതാഘാതമേറ്റ് ഗുരതരാവസ്ഥയിൽ. കർണാടകയിലെ മംഗളൂരുവിലെ ജോകട്ടേ റോഡ് നമ്പർ 04 ന് സമീപമുള്ള റെയിൽവേ ട്രാക്കിലാണ് സംഭവം. മുഹമ്മദ് ദിഷാൻ എന്ന കൗമാരക്കാരനാണ് സെൽഫി എടുക്കുന്നതിനായി ഗുഡ്സ് വണ്ടിയുടെ മുകളിൽ കയറിയത്. റെയിൽവെ ട്രാക്കിലെ ഇലട്രിക്ക് കേബിളിൽ നിന്ന് വൈദ്യതാഘാതമേൽക്കുകയായിരുന്നു. 25,000 വോൾട്ട് പവറുള്ള കേബിളിൽ തട്ടി ദിഷാൻ തെറിച്ചു വീണു. കുട്ടിയുടെ ശരീരത്തിന്റെ പകുതിഭാഗത്തും പൊള്ളലേറ്റിട്ടുണ്ട്.
ദിഷനെ ഉടൻതെന്നെ മംഗളൂരുവിലെ എജെ ആശുപത്രിയിലെ അത്യാഹിത വിഭാഗത്തിൽ പ്രവേശിപ്പിച്ചു. അപകട നിലതരണം ചെയ്തിട്ടില്ല. സംഭവത്തെ കുറിച്ച് ലോക്കൽ പൊലീസ് അന്വേഷണം ആരംഭിച്ചിട്ടുണ്ട്. റെയിൽവേ പ്രൊട്ടക്ഷൻ ഫോഴ്സ് ഇൻസ്പെക്ടർ ആശുപത്രി സന്ദർശിച്ച് കുടുംബാംഗങ്ങളിൽ നിന്ന് മൊഴിയെടുത്തു.
ഉത്തർപ്രദേശിലെ ബുദാൻ ജില്ലയിലെ ഇസ്ലാംനഗറിൽ ഓടുന്ന ബൈക്കിൽ നിന്നും ചിത്രമെടുക്കാൻ ശ്രമിച്ച 17 കാരൻ കഴിഞ്ഞ ദിവസം മരണപ്പെട്ടിരുന്നു. അപകടത്തിൽ ഇയാളുടെ രണ്ട് സുഹൃത്തുക്കൾക്കും ഗുരുതരമായി പരിക്കേറ്റു. ബൈക്ക് ഓടിക്കുന്നതിനിടെ സെൽഫിയെടുക്കാൻ ശ്രമിച്ചതാണ് അപകട കാരണം. ബൈക്കിന്റെ ബാലൻസ് നഷ്ടപ്പെടുകയും വൈദ്യുത തൂണിൽ ഇടിക്കുകയുമായിരുന്നു. തുടർന്ന് മൂവരെയും ആശുപത്രിയിലെത്തിച്ചെങ്കിലും 17 കാരന്റെ ജീവൻ രക്ഷിക്കാനായില്ല.