കൊവിഡ്19 കായിക ലോകത്ത് ഭീതി സൃഷ്ടിക്കുന്നത് തുടരുന്നു. യുവന്റസിന്റെ ഫ്രഞ്ച്താരം ബ്ലെയിസ് മറ്റ്യൂഡിക്ക് കൊറോണ വൈറസ് ബാധ സ്ഥിരീകരിച്ചു. അസുഖ ബാധിതനാകുന്ന യുവന്റസ് ക്ലബിന്റെ രണ്ടാമത്തെ കളിക്കാരനാണ് ബ്ലെയിസ് മറ്റ്യൂഡി. യുവന്റസിന്റെ മറ്റൊരു താരമായ ഡാനിയേല റുഗാനിക്കാണ് ആദ്യം കോവിഡ്19 സ്ഥിരീകരിച്ചത്. മറ്റ്യൂഡി ഹോം ക്വാറന്റയിൽ പ്രവേശിച്ചതായി ക്ലബ് അധികൃതർ അറിയിച്ചു. 2018 ലെ ലോകകപ്പ് നേടിയ ഫ്രാൻസ് ടീമിലെ അംഗമായിരുന്നു മറ്റ്യൂഡി.
കോവിഡ്19 ഏറ്റവും ഗുരുതരമായി ബാധിച്ച ഇറ്റലിയിൽ കായിക മത്സരങ്ങൾ അടുത്ത മാസം വരെ നിർത്തിവെച്ചിരിക്കുകയാണ്. വലൻസിയ ക്ലബിനെ കളിക്കാർ ഏറെക്കുറെ പൂർണമായും കോവിഡിന്റെ പിടിയിലാണ്. കളിക്കാരും, കോച്ചും, സ്കൗട്ടിങ്ങ് സ്റ്റാഫും ഉൾപ്പെടെയുള്ളവർ ഐസോലേഷനിലാണ്. കഴിഞ്ഞ മാസം അവസാനം മിലാനിൽ ടീം കളത്തിൽ ഇറങ്ങിയിരുന്നു. ചാമ്പ്യൻസ് ലീഗ് മത്സരത്തിലാണ് ടീം കളിച്ചത്. അറ്റലാന്റക്ക് എതിരായ മത്സരം കാണാൻ പതിനായിരങ്ങൾ തടിച്ചുകൂടിയിരുന്നു എന്നത് അധികൃതരെ ആശങ്കയിലാക്കിയിട്ടുണ്ട്. തുടർന്ന് നടത്തിയ പരിശോധനയിലാണ് 4 താരങ്ങൾക്ക് അസുഖം സ്ഥിരീകരിച്ചത്.
