ഡല്‍ഹി: അനുപമക്ക് നിഷേധിക്കപ്പെട്ടത് നീതിയാണെന്ന് പൊളിറ്റ്ബ്യൂറോ അംഗം വൃന്ദ കാരാട്ട്. മനുഷ്യത്വരഹിതമായ പ്രവര്‍ത്തനങ്ങളാണ് സംഭവിച്ചുകൊണ്ടിരിക്കുന്നത്. സ്വന്തം കുഞ്ഞിനെ അന്വേഷിച്ച് ഒരു അമ്മക്ക് നടക്കേണ്ടി വരികയെന്നത് വളരെ ദുഖകരമായ അവസ്ഥയാണെന്നും വൃന്ദ കാരാട്ട് പറഞ്ഞു. കുഞ്ഞിനെ ദത്തെടുക്കുന്നതില്‍ കര്‍ശനമായ നിയമം നിലനില്കുന്ന രാജ്യമാണിത്‌. തെറ്റായ കാര്യമാണ് സംഭവിച്ചിരിക്കുന്നത്. കുഞ്ഞിനെ അനുപമക്ക് ലഭിക്കണമെന്നും വൃന്ദ കാരാട്ട് കൂട്ടിച്ചേര്‍ത്തു.
അതേസമയം, കുഞ്ഞിനെ തിരികെ ലഭിക്കുന്നതിനായി സെക്രട്ടറിയേറ്റിനുമുന്നില്‍ നിരാഹാരമാരംഭിച്ചിരിക്കുകയാണ് അനുപമയും ഭര്‍ത്താവ് അജിത്തും. പരാതിപ്പെട്ട് മാസങ്ങളായിട്ടും നടപടിയില്ലാത്തതിനാലാണ് പ്രത്യക്ഷ സമരത്തിലേക്ക് പോകുന്നതെന്നും അനുപമ വ്യക്തമാക്കി. കേസില്‍ പ്രതികളായ അനുപമയുടെ അച്ഛന്‍ ജയചന്ദ്രനെയും അമ്മ സ്മിതയെയും രണ്ടുദിവസത്തിനുളളില്‍ ചോദ്യം ചെയ്യും. വിഷയത്തില്‍ പൊലീസിന് വീഴ്ച്ച പറ്റിയെന്ന് വ്യാപക പരാതികളുയര്‍ന്ന സാഹചര്യത്തില്‍ പേരൂര്‍ക്കട സി ഐയുടെ നേതൃത്വത്തില്‍ നടക്കുന്ന അന്വേഷണത്തിന്റെ മേല്‍നോട്ടചുമതല കണ്‍ടോണ്‍മെന്റ് അസിസ്റ്റന്റ് കമ്മീഷണര്‍ക്ക് നല്‍കിയിട്ടുണ്ട്.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
അനുപമയ്ക്ക് ആവശ്യമായ നിയമസഹായം നല്‍കുമെന്നും സിപിഎം ഒരു തെറ്റിനെയും പിന്താങ്ങില്ലെന്നും സിപിഎം സംസ്ഥാന സെക്രട്ടറി എ. വിജയരാഘവന്‍ പറഞ്ഞു. പാര്‍ട്ടിക്ക് പ്രശ്‌നം പരിഹരിക്കാനാവില്ല. നിയമപരമായി മാത്രമേ പരിഹാരം കാണാനാവുകയുളളു. ഈ വിഷയത്തില്‍ പാര്‍ട്ടിയെ കുറ്റപ്പെടുത്തിയിട്ട് കാര്യമില്ലെന്നും അദ്ദേഹം പറഞ്ഞു.
