തിരുവനന്തപുരം: ഐടി പാര്ക്കുകളില് വൈന് പാര്ലറുകള് ആരംഭിക്കുമെന്ന് മുഖ്യമന്ത്രി. നിയമസഭയിലാണ് മുഖ്യമന്ത്രി ഇക്കാര്യം പറഞ്ഞത്. ഐടി പാര്ക്ക് പ്രതിനിധികള് നല്കിയ റിപ്പോര്ട്ടില് പബ് പോലുള്ള സൗകര്യമില്ലാത്തത് പ്രധാന പോരായ്മയായി ചൂണ്ടിക്കാട്ടിയിരുന്നു. ഈ പ്രശ്നം പരിഹരിക്കാനാണ് സര്ക്കാര് ശ്രമിക്കുന്നത്. കൊവിഡിന് മുന്പ് തന്നെ ഇതുമായി ബന്ധപ്പെട്ട ചര്ച്ചകള് പുരോഗമിച്ചിരുന്നെങ്കിലും ലോക്ഡൌണും പിന്നീട് വര്ക്ക് ഫ്രം ഹോം മോഡിലേക്ക് ജോലി മാറിയതും കൊണ്ടുമാണ് പബുമായി ബന്ധപ്പെട്ട ചര്ച്ചകള് നിര്ത്തി വെച്ചിരുന്നതെന്നും മുഖ്യമന്ത്രി കൂട്ടിച്ചേര്ത്തു.
സംസ്ഥാനത്ത് ഒന്നര ലക്ഷം ആളുകളാണ് ഐടി മേഖലയില് ജോലി ചെയ്യുന്നത്. ഇതില് തിരുവനന്തപുരം ടെക്നോപാര്ക്കില് മാത്രം അറുപതിനായിരത്തിലധികം ആളുകള് ജോലി ചെയ്യുന്നു. അതിനാല് ഇടവേളകളും വിശ്രമ സമയങ്ങളും ചെലവഴിക്കുന്നതിന് ഇത്തരം കേന്ദ്രങ്ങള് തുറക്കുന്നതുവഴി കേരളത്തിന് പുറത്തുള്ള ടെക്കികളെയും സംസ്ഥാനത്തേക്ക് കൂടുതലായി ആകര്ഷിക്കാന് സാധിക്കുമെന്നാണ് കണക്കുകൂട്ടുന്നതെന്നും മുഖ്യമന്ത്രി നിയമസഭയില് വ്യക്തമാക്കി.
മുസിരിസ് പോസ്റ്റിനെ ടെലഗ്രാം, വാട്സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്റ്റോറികള്ക്കായി ഞങ്ങളുടെ യൂട്യൂബ് ചാനല് സബ്സ്ക്രൈബ് ചെയ്യുക
ഐ ടി പാര്ക്കുകളില് കൂടുതലായും യുവജനങ്ങളാണ് ജോലി ചെയ്യുന്നത്. കേരളത്തിന് പുറത്തുള്ള സൌകര്യങ്ങള് ഇവിടെയും ലഭിക്കണമെന്ന് അവര്ക്കും ആഗ്രഹമുണ്ടായിരിക്കും. മറ്റ് സംസ്ഥാനങ്ങളിലെ പോലെ ഇവിടെ സൗകര്യം ഒരുക്കാന് സാധിക്കാത്തത് പോരായ്മയായി മാത്രമേ കാണാന് സാധിക്കുകയുള്ളൂവെന്നും മുഖ്യമന്ത്രി പറഞ്ഞു. കുറുക്കോളി മൊയ്തീൻ എംഎൽഎയുടെ ചോദ്യത്തിന് മറുപടി നൽകുമ്പോഴായിരുന്നു മുഖ്യമന്ത്രിയുടെ വിശദീകരണം. ഐടി മേഖലയിലെ പ്രശ്നങ്ങള്ക്കായിരുന്നു ഇന്നത്തെ ചോദ്യോത്തരവേളയില് കൂടുതല് പ്രാധാന്യം നല്കിയിരുന്നത്.