ദുബായ്: പൗരന്മാരുടെ സ്വകാര്യത സംരക്ഷിക്കുന്നതിനായി പുതിയ സൈബര് നിയമവുമായി യു എ ഇ. ഈ നിയമം അനുസരിച്ച് അനുവാദമില്ലാതെ പൊതുസ്ഥലത്ത് വെച്ച് ഒരാളുടെ ഫോട്ടോ എടുത്താല് ഒരു കോടി രൂപ പിഴയോ ആറ് മാസം തടവോ ലഭിക്കും. 2022 ജനുവരി രണ്ട് മുതലാണ് നിയമം പ്രബല്യത്തില് വരിക. അതോടൊപ്പം, നിയമം അനുസരിച്ച് ബാങ്കുകൾ, മാധ്യമങ്ങൾ, ആരോഗ്യം, സയൻസ് മേഖലകളിലെ ഡാറ്റാ സിസ്റ്റങ്ങൾ എന്നിവക്ക് കേടുപാടുകൾ വരുത്തുന്നവര്ക്കും കടുത്ത ശിക്ഷകൾ ലഭിക്കും.
2021- ലെ ഫെഡറൽ നിയമം, സൈബർ ക്രൈം നിയമം, ഓൺലൈനിൽ നടക്കുന്ന കുറ്റകൃത്യങ്ങൾക്കെതിരെയുള്ള നിയമം എന്നീ നിയമങ്ങളില് ഭേദഗതികൾ വരുത്തിയാണ് പുതിയ നിയമം കൊണ്ട് വന്നിരിക്കുന്നത്. നെറ്റ്വർക്കുകൾ, ഇൻഫർമേഷൻ ടെക്നോളജിയുടെ ഉപയോഗം, പൊതുമേഖലാ വെബ്സൈറ്റുകളും ഡാറ്റാബേസുകളും സംരക്ഷിക്കൽ, തെറ്റിദ്ധരിപ്പിക്കുന്നതോ വ്യാജമോ ആയ വാർത്തകളുടെ വ്യാപനം ചെറുക്കുക, ഓൺലൈൻ കുറ്റകൃത്യങ്ങൾക്കെതിരെ കമ്മ്യൂണിറ്റി സംരക്ഷണം വർദ്ധിപ്പിക്കുക എന്നീ കാര്യങ്ങളും പുതിയ നിയമത്തിലൂടെ ലക്ഷ്യം വെക്കുന്നുണ്ട്.
കുറ്റകൃത്യത്തില് ഏര്പ്പെടുന്നത് യു എ ഇ ക്ക് പുറത്തുള്ള ആളുകളോ വെബ് പ്ലാറ്റ്ഫോമുകളോ ആണെങ്കില്പ്പോലും നടപടികള് സ്വീകരിക്കുന്നതിന് സൈബര് ക്രൈം നിയമത്തിലെ പുതിയ ഭേദഗതികള്ക്ക് സാധിക്കും.