വാഷിംഗ്‌ടണ്‍: ആഫ്രോ-അമേരിക്കന്‍ വംശര്‍ക്ക് കൊറോണാബാധ വരാന്‍ സാദ്ധ്യത കൂടുതലാണെന്ന് അമേരിക്കന്‍ പ്രസിഡന്‍റ് ഡോണാള്‍ഡ് ട്രംപ് പറഞ്ഞു. വസ്തുതകളുടെ അടിസ്ഥാനത്തിലാണ് താന്‍ പറയുന്നത് എന്നും ട്രംപ് കൂട്ടിച്ചേര്‍ത്തു. ഒരു കോടി എണ്‍പത്തേഴു ലക്ഷം പേരില്‍ കോവിഡ് -19 സ്രവ പരിശോധന നടത്തിയതില്‍ ആഫ്രോ-അമേരിക്കന്‍ വംശരാണ് രോഗം സ്ഥിരീകരിക്കപ്പെട്ടവരില്‍ കൂടുതലെന്നും അമേരിക്കന്‍ പ്രസിഡന്‍റ് പറഞ്ഞു.
എന്നാല്‍ പ്രസിഡന്‍റിന്‍റെ ഈ നിരീക്ഷണത്തെ ശരിവെക്കുന്ന യാതൊരു വിവരവും തങ്ങള്‍ക്ക് കണ്ടെത്താന്‍ കഴിഞ്ഞിട്ടില്ലെന്ന് വൈറ്റ് ഹൌസ് ടാസ്ക് ഫോഴ്സ് ഇന്‍ ചാര്‍ജ് ഡെബോറ പറഞ്ഞു . അത്തരമൊരു വിവരവുമായി ബന്ധപ്പെട്ട ഗവേഷണ രേഖകളൊന്നും തങ്ങളുടെ കൈവശമില്ല. ആഫ്രോ-അമേരിക്കന്‍ വംശര്‍ക്ക് വൈറസ് സാധ്യത കൂടുതലാണെന്ന ധാരണയുണ്ടാക്കാന്‍ തങ്ങള്‍ ആഗ്രഹിക്കുന്നില്ലെന്നും ഡെബോറ വ്യക്തമാക്കി.
ജീവിത ശൈലീരോഗങ്ങള്‍കൊണ്ട് ഏറ്റവുമധികം ദുരുതമനുഭവിക്കുന്നത് ആഫ്രോ-അമേരിക്കന്‍ സമൂഹത്തിലുള്ളവരാണെന്നും പുതിയ സാഹചര്യത്തില്‍ ഇത് ആശങ്ക സൃഷ്ടിക്കും വിധം രോഗബാധക്ക് കാരണമാകുന്നുണ്ടെന്നും യു.എസ് ആരോഗ്യ മന്ത്രാലയം വക്താവ് കൂടിയായ ആന്‍റണി ഫൌസി പറഞ്ഞിരുന്നു. ഇതിന്‍റെ ബലത്തിലാണ് ഡോണാള്‍ഡ് ട്രംപിന്‍റെ പ്രസ്താവനയെന്നാണ് കരുതുന്നത്.
