മരണനിരക്കില്‍ ക്രമാനുഗതമായ കുറവ്
വാഷിംഗ്‌ടണ്‍: അമേരിക്കയില്‍ കഴിഞ്ഞ രണ്ടു ദിവസങ്ങളിലായി മരണനിരക്കില്‍ ക്രമാനുഗതമായ കുറവ് രേഖപ്പെടുത്തി. ഇത് ശുഭസൂചകമായാണ് പൊതുവില്‍ വിലയിരുത്തപ്പെടുന്നത്. എന്നാല്‍ പുതുതായി രോഗം സ്ഥിരീകരിക്കപ്പെട്ടവരുടെ എണ്ണത്തില്‍ വര്ദ്ധനവ് രേഖപ്പെടുത്തുന്നത് തുടരുകയാണ്. കഴിഞ്ഞ 24 മണിക്കൂറിനുള്ളില്‍ 1,548 പേരാണ് മരണപ്പെട്ടത്. കഴിഞ്ഞ ദിവസം 1802 പേരാണ് മരണപ്പെട്ടത്. എന്നാല്‍ ശനിയാഴ്ച 20,77 പേരാണ് മരണമടഞ്ഞത്. രോഗം സ്ഥിരീകരിക്കപ്പെട്ടവരുടെ എണ്ണം കഴിഞ്ഞ ദിവസം 5,32,879 ആയിരുന്നത് കഴിഞ്ഞ 24 മണിക്കൂറിനുള്ളില്‍ 5,60,433 ആയി വര്‍ദ്ധിച്ചിട്ടുണ്ട്. ഏകദേശം 28,000 ത്തിനടുത്താണ് വര്ദ്ധനവ്.
അതേസമയം ലോകത്തെ മറ്റെല്ലാ രാഷ്ട്രങ്ങളെയും അപേക്ഷിച്ച് കോവിഡ്-19 മൂലമുള്ള മരണനിരക്ക് അമേരിക്കയില്‍ നിയന്ത്രണാതീതമായിത്തന്നെ തുടരുകയാണ്. ഏറ്റവും പുതിയ കണക്കനുസരിച്ച് 22,125 - പേര്‍ ഇതിനകം മരണപ്പെട്ടു. 5,60,433 പേര്‍ക്ക് രോഗം സ്ഥിരീകരിച്ചിട്ടുണ്ട്. നേരിയ കുറവ് രേഖപ്പെടുത്തുന്നുണ്ടെങ്കിലും രോഗികളുടെ എണ്ണവും മരണനിരക്കും ക്രമാതീതമായി കൂടിക്കൊണ്ടിരിക്കുകയാണ്.
ന്യൂയോര്‍ക്കില്‍ മാത്രം കഴിഞ്ഞ 24 മണിക്കൂറിനുള്ളില്‍ 758 പേര്‍ മരിച്ചു
രാജ്യത്ത് ഏറ്റവും കൂടുതല്‍ മരണം റിപ്പോര്‍ട്ട് ചെയ്യപ്പെട്ട ന്യൂയോര്‍ക്കില്‍ മരണസംഖ്യ 9,385 ആയി. ഇവിടെ മാത്രം 1,89,415- പേര്‍ക്ക് രോഗബാധ സ്ഥിരീകരിച്ചു. 2,350- പേര്‍ മരണമടഞ്ഞ ന്യൂ ജെഴ്സിയാണ് മരണ - രോഗ നിരക്കില്‍ തൊട്ടുപിറകില്‍ നില്‍ക്കുന്നത്. ഇവിടെ ഇതുവരെ 61,850 പേര്‍ക്ക് രോഗം സ്ഥിരീകരിച്ചിട്ടുണ്ട്. 688 പേര്‍ മരണമടഞ്ഞ കാലിഫോര്‍ണിയയില്‍ 23,397- പേര്‍ക്ക് രോഗം സ്ഥിരീകരിച്ചിട്ടുണ്ട്. 24,638- പേര്‍ക്ക് രോഗം സ്ഥിരീകരിച്ച മിഷിഗണില്‍ 1,487 പേര്‍ മരണപ്പെട്ടു. ഫ്ലോറിഡ -461, മസ്സാച്ചുസെറ്റ്സ് -756, ലൂസിയാന - 840, ഇല്ലിനോയിസ് -720, ജോര്‍ജ്ജിയ -442 എന്നിങ്ങനെയാണ് ഏറ്റവും പുതിയ മരണ നിരക്ക്.
തലസ്ഥാനമായ വാഷിംഗ്‌ടണില്‍ ഏറ്റവും ഒടുവിലെ കണക്കനുസരിച്ച് 511 പേര്‍ മരണമടഞ്ഞിട്ടുണ്ട്. 10,530 പേര്‍ക്കാണിവിടെ രോഗം സ്ഥിരീകരിച്ചിരിക്കുന്നത്. അമേരിക്കയില്‍ ഇന്നലെയും ഇന്നുമായി മരണനിരക്കില്‍ കുറവാണ് രേഖപ്പെടുത്തിയത്. രാജ്യത്ത് സ്ഥിതിഗതികള്‍ ഇപ്പോഴും നില അതീവ ഗുരുതരമായി തുടരുകയാണ്.
