ചെന്നൈ: തെന്നിന്ത്യന്‍ നടി തൃഷ കൃഷ്ണന്‍ രാഷ്ട്രീയത്തിലേക്കെന്ന് റിപ്പോര്‍ട്ട്. തമിഴ് മാധ്യമങ്ങളാണ് തൃഷ രാഷ്ട്രീയത്തിലേക്കിറങ്ങുന്നു എന്ന തരത്തില്‍ വാര്‍ത്തകള്‍ പുറത്തുവിട്ടിരിക്കുന്നത്. രാഷ്ട്രീയ സാധ്യതകളെല്ലാം പരിശോധിച്ചതിനുശേഷം ദേശീയ പാര്‍ട്ടിയായ കോണ്‍ഗ്രസില്‍ ചേരാനാണ് അവര്‍ തീരുമാനിച്ചതെന്നാണ് വാര്‍ത്ത. കോണ്‍ഗ്രസ് നേതാക്കളുമായി നടി അനൗദ്യോഗിക ചര്‍ച്ചകള്‍ നടത്തിയതായും വാര്‍ത്തയുണ്ട്. എന്നാല്‍ രാഷ്ട്രീയ പ്രവേശനം സംബന്ധിച്ച് നടിയുടെ ഭാഗത്തുനിന്നും ഔദ്യോഗിക സ്ഥിരീകരണമുണ്ടായിട്ടില്ല.
എംജിആര്‍, ജയലളിത, കമല്‍ഹാസന്‍, വിജയകാന്ത്, ഖുഷ്ബു തുടങ്ങി സിനിമയില്‍നിന്ന് രാഷ്ട്രീയത്തിലെത്തിയവര്‍ നിരവധിയാണ്. ഇക്കൂട്ടത്തിലേക്കാണ് തൃഷയുമെത്തുന്നത്. ജനങ്ങളെ സഹായിച്ചുകൊണ്ടുളള നടന്‍ വിജയ്‌യുടെ പ്രവര്‍ത്തനങ്ങളില്‍നിന്ന് പ്രചോദനം ഉള്‍ക്കൊണ്ടാണ് രാഷ്ട്രീയത്തിലേക്കിറങ്ങാന്‍ നടി തീരുമാനിച്ചതെന്നും റിപ്പോര്‍ട്ടുണ്ട്.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
അതേസമയം, മണിരത്‌നം സംവിധാനം ചെയ്യുന്ന ബ്രഹ്‌മാണ്ഡ ചിത്രം പൊന്നിയിന്‍ സെല്‍വനാണ് നടിയുടെ അടുത്തതായി പുറത്തിറങ്ങാനിരിക്കുന്ന ചിത്രം. വിക്രം, ജയം രവി, ഐശ്വര്യാ റായ്, കാര്‍ത്തി തുടങ്ങി വന്‍ താരനിരയാണ് ചിത്രത്തില്‍ അണിനിരക്കുന്നത്. ചോള രാജവംശത്തിന്റെ ചരിത്ര പശ്ചാത്തലത്തില്‍ ഒരുങ്ങുന്ന ചിത്രത്തില്‍ കുന്തവി രാജ്ഞിയായാണ് തൃഷ വേഷമിടുന്നത്.
