കേന്ദ്ര സർക്കാർ ജീവനക്കാർക്ക് പ്രഖ്യാപിച്ച അധിക ക്ഷാമബത്ത ഉടൻ നൽകില്ല. ജീവനക്കാരുടെ ക്ഷാമബത്തയിൽ 4 ശതമാനത്തിന്റെ വർദ്ധനവാണ് കേന്ദ്ര സർക്കാർ പ്രഖ്യാപിച്ചിരുന്നത്. ക്ഷാമബത്ത 17 ശതമാനത്തിൽ നിന്ന് 21 ശതമാനമായാണ് വർദ്ധിപ്പിച്ചത്. ഈ തീരുമാനമാണ് മരവിപ്പിച്ചത്. ക്ഷാമബത്ത വർദ്ധന പ്രഖ്യാപിച്ചിരുന്നെങ്കിലും ഉത്തരവ് ഇറങ്ങിയിരുന്നില്ല. ജീവനക്കാരുടെ പ്രത്യേക അലവൻസുകളും താൽകാലികമായി നിർത്തിവെച്ചു. അതേസമയം സ്ഥിരം അലവൻസുകളിലും ബത്തകളിലും മാറ്റമുണ്ടാകില്ലെന്ന് കേന്ദ്ര സർക്കാർ അറിയിച്ചു.
കൊവിഡ് പ്രതിരോധത്തിന്റെ ഭാഗമായി ലോക്ഡൗൺ പ്രഖ്യാപിച്ച സാഹചര്യത്തിലെ സാമ്പത്തിക പ്രതിസന്ധി മറികടക്കാനാണ് ഉത്തരവ് മരവിപ്പിച്ചത്. ഇതിലൂടെ സമാഹരിക്കുന്ന പണം കൊവിഡ് പ്രതിരോധ പ്രവർത്തനങ്ങൾക്ക് ഉപയോഗിക്കും. ഇത് സംബന്ധിച്ച് ധനകാര്യമന്ത്രാലയം വകുപ്പുകൾക്ക് അറിയിപ്പ് നൽകി.
