കല്‍പ്പറ്റ: കൂലി കൂട്ടി ചോദിച്ചതിന് മധ്യവയസ്‌കനായ ആദിവാസി തൊഴിലാളിക്ക് മര്‍ദ്ദനം. വയനാട് അമ്പലവയലിലാണ് സംഭവം. നീര്‍ച്ചാല്‍ കോളനിയിലെ ബാബുവിനാണ് തൊഴിലുടമയില്‍നിന്ന് ക്രൂരമര്‍ദ്ദനമേറ്റത്. കുരുമുളക് പറിച്ചതിന് നൂറുരൂപ കൂടുതല്‍ കൂലി ചോദിച്ചതിന് തൊഴിലുടമയായ മഞ്ഞപ്പാറ കരുവളംവീട്ടില്‍ അനീഷാണ് ബാബുവിനെ മര്‍ദ്ദിച്ചത്. മുഖത്ത് ചവിട്ടേറ്റ ബാബുവിന്റെ താടിയെല്ല് പൊട്ടി. ബത്തേരി താലൂക്ക് ആശുപത്രിയില്‍ ചികിത്സയിലായിരുന്ന ബാബുവിനെ കോഴിക്കോട് മെഡിക്കല്‍ കോളേജിലേക്ക് മാറ്റി. അനീഷിനെതിരെ എസ് സി എസ് ടി അതിക്രമ നിരോധന നിയമപ്രകാരം കേസ് രജിസ്റ്റര്‍ ചെയ്തു.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
കഴിഞ്ഞ ശനിയാഴ്ച്ചയാണ് ബാബുവിന് തൊഴിലുടമയില്‍നിന്ന് മര്‍ദ്ദനമേറ്റത്. മര്‍ദ്ദനമേറ്റ വിവരം ഇദ്ദേഹം ആരോടും പറഞ്ഞിരുന്നില്ല. തിങ്കളാഴ്ച്ച സാധനം വാങ്ങാന്‍ കടയിലെത്തിയപ്പോള്‍ മുഖത്തെ നീരുകണ്ട് കടയുടമ ചോദിച്ചപ്പോഴാണ് ബാബു അനീഷ് മുഖത്ത് ചവിട്ടിയ വിവരം വെളിപ്പെടുത്തിയത്. പ്രദേശത്തെ എസ് സി പ്രമോട്ടറെ സിനിയോട് കടയുടമയാണ് ഇക്കാര്യം പറഞ്ഞത്.
തുടര്‍ന്ന് ബാബുവിനെ സുല്‍ത്താന്‍ ബത്തേരിയിലെ ആശുപത്രിയില്‍ പ്രവേശിപ്പിച്ചു. താടിയെല്ലിലെ പൊട്ടല്‍ ഗുരുതരമാണെന്ന് കണ്ടെത്തിയതോടെ കോഴിക്കോട് മെഡിക്കല്‍ കോളേജിലേക്ക് മാറ്റുകയായിരുന്നു. ബാബുവിന്റെ മൊഴിയെടുത്തതിനുശേഷമാണ് പൊലീസ് കേസെടുത്തത്. വിശദമായ അന്വേഷണത്തിനുശേഷം അനീഷിനെതിരെ കൂടുതല്‍ വകുപ്പുകള്‍ ചേര്‍ക്കും.
