തിരുവനന്തപുരം: സ്പ്രിങ്ക്ളര്‍ കരാറുമായി ബന്ധപ്പെട്ട ഹൈക്കോടതിയുടെ ഇടക്കാല വിധി പ്രതിപക്ഷം ഉന്നയിച്ച ആക്ഷേപങ്ങളും ആവശ്യങ്ങളുംനിരാകരിക്കുന്ന വിധിയാണെന്ന് മുഖ്യമന്ത്രി പിണറായി വിജയന്‍ പറഞ്ഞു. തിരുവനന്തപുരത്ത് കോവിഡ് -19 പ്രതിരോധ പ്രവര്‍ത്തനങ്ങളുമായി ബന്ധപ്പെട്ട അവലോകന യോഗത്തിനു ശേഷം സംസാരിക്കുകയായിരുന്നു മുഖ്യമന്ത്രി. നിലവിലുള്ള പ്രവര്‍ത്തനങ്ങളുമായി മുന്നോട്ടു പോകാനാണ് കോടതി ആവശ്യപ്പെട്ടിട്ടുള്ളത്. അത് സര്‍ക്കാര്‍ മുന്നോട്ടുകൊണ്ടു പോകുക തന്നെ ചെയ്യും. പ്രതിപക്ഷം കോടതിയില്‍ ആവശ്യപ്പെട്ടിരുന്നത് കരാര്‍ പൂര്‍ണ്ണമായും റദ്ദാക്കണമെന്നാണ് അതെല്ലെങ്കില്‍ സ്റ്റേ ചെയ്യുകയെങ്കിലും വേണമെന്നായിരുന്നു ആവശ്യംഇത് രണ്ടും കോടതി തള്ളിയിരിക്കുകയാണെന്നും മുഖ്യമന്ത്രി പറഞ്ഞു.
ഇടക്കാല ഉത്തരവില്‍ ഡാറ്റ സുരക്ഷ ഉറപ്പു വരുത്തണമെന്നാണ് കോടതി ആവശ്യപ്പെട്ടിട്ടുള്ളത്. ഇക്കാര്യത്തില്‍ സര്‍ക്കാര്‍ പ്രതിജ്ഞാബദ്ധമാണ് എന്ന് നേരത്തെ തന്നെ വ്യക്തമാക്കിയിട്ടുള്ളതാണെന്നും മുഖ്യമന്ത്രി പറഞ്ഞു. കേസ് പരിഗണിക്കുമ്പോള്‍ അതിന്റെ വസ്തുതകള്‍ മനസ്സിലാക്കാന്‍ പല ചോദ്യങ്ങളും കോടതി ചോദിക്കും. അതല്ല ഉത്തരവില്‍ എന്തു പറഞ്ഞു എന്നതാണ് പ്രധാനം എന്ന് മാദ്ധ്യമ പ്രവര്‍ത്തകരുടെ ചോദ്യത്തിന് മറുപടിയായി മുഖ്യമന്ത്രി പറഞ്ഞു.
സ്പ്രിങ്ക്ളര്‍ കമ്പനിയുമായി ബന്ധപ്പെട്ട കരാറുമായി മുന്നോട്ടുപോകാനാണ് കോടതിയില്‍ നിന്ന് അനുമതി ലഭിച്ചിരിക്കുന്നത്. ഡാറ്റാ അനാലിസിസുമായി ബന്ധപ്പെട്ട് ഇത്തരമൊരു കമ്പനിയെ നമുക്ക് ലഭിച്ചതു തന്നെ വലിയ കാര്യമാണ്. ഇപ്പോള്‍ ചിലര്‍ കരുതുന്നതുപോലെ നാം പ്രശ്നങ്ങളെ മറികടന്നുകഴിഞ്ഞു എന്ന് കരുതരുത്. മൂന്നാം ഘട്ടത്തില്‍ രോഗവ്യാപനമുണ്ടായാല്‍ ലക്ഷങ്ങളായിരിക്കും രോഗ ബാധിതരാവുക. അത്തരമൊരു ഘട്ടത്തില്‍ ഡാറ്റാ വിശകലനത്തിന് ഇത്തരം കമ്പനികള്‍ക്ക് മാത്രമേ സാധിക്കൂവെന്നും മുഖ്യമന്ത്രി മാധ്യമ പ്രവര്‍ത്തകരുടെ ചോദ്യങ്ങള്‍ക്ക് മറുപടിയായി മുഖ്യമന്ത്രി പറഞ്ഞു.
