തിരുവനന്തപുരം: സര്ക്കാരിന്റെ അമിതമായ ആത്മവിശ്വാസമുണ്ടാക്കിയ ജാഗ്രതക്കുറവാണ് ഇടുക്കി, കോട്ടയം ജില്ലകളെ വീണ്ടും റെഡ് സോണ് ആക്കി മാറ്റിയത് എന്ന കേന്ദ്ര സഹമന്ത്രി വി. മുരളീധരന്റെ പ്രസ്താവന തന്റെ ശ്രദ്ധയില് പെട്ടിട്ടില്ലെന്നും അങ്ങിനെ പറഞ്ഞിട്ടുണ്ടെങ്ങില് അത് ശുദ്ധ വിവരക്കെടാണെന്നും മുഖ്യമന്ത്രി പിണറായി വിജയന് പറഞ്ഞു. കേന്ദ്ര മന്ത്രിയായിരിക്കുന്ന ഒരാള് അങ്ങനെ പറയുമെന്ന് താന് കരുതുന്നില്ലെന്നും മുഖ്യമന്ത്രി കൂട്ടിച്ചേര്ത്തു.
സംസ്ഥാന സര്ക്കാരിനു കാര്യങ്ങള് ആലോചിക്കാനും തീരുമാനങ്ങളെടുക്കാനും സംവിധാനങ്ങളുണ്ട്. ഇടുക്കി, കോട്ടയം ജില്ലകളില് രോഗവ്യാപനത്തിനുള്ള സാധ്യത കണക്കിലെടുത്താണ് പ്രത്യേക ജാഗ്രത പുലര്ത്താന് തീരുമാനിച്ചതെന്നും മുഖ്യമന്ത്രി പറഞ്ഞു. കോവിഡ്-19 അവലോകന യോഗത്തിനു ശേഷം തിരുവനന്തപുരത്ത് മാധ്യമ പ്രവര്ത്തകരോട് സംസാരിക്കുകയായിരുന്നു മുഖ്യമന്ത്രി