മലപ്പുറം: ശാസ്ത്രം പ്രചരിപ്പിക്കുക എന്നതിനര്‍ത്ഥം വിശ്വാസത്തെ തളളിപ്പറയുക എന്നല്ലെന്ന് സ്പീക്കര്‍ എ എന്‍ ഷംസീര്‍. ശാസ്ത്രത്തെ പ്രോത്സാഹിപ്പിക്കേണ്ടത് അനിവാര്യമാണെന്നും ഭിന്നിപ്പുണ്ടാക്കാന്‍ ഒരു ശക്തിയെയും അനുവദിക്കില്ലെന്ന പ്രഖ്യാപനമാണ് ഓരോ കുട്ടിയും ഇന്ന് നടത്തേണ്ടതെന്നും എ എന്‍ ഷംസീര്‍ പറഞ്ഞു. മലപ്പുറത്ത് നടന്ന ഒരു ചടങ്ങില്‍ സംസാരിക്കുകയായിരുന്നു അദ്ദേഹം.
'ശാസ്ത്രം സത്യമാണ്. ശാസ്ത്രത്തിന്റെ കണ്ടുപിടുത്തങ്ങളെല്ലാം പ്രചരിപ്പിക്കാന്‍ നമുക്കാവണം. ശാസ്ത്രത്തെ പ്രചരിപ്പിക്കുക എന്നതിനര്‍ത്ഥം വിശ്വാസത്തെ തളളിപ്പറയുക എന്നല്ല. ശാസ്ത്രത്തെ പ്രചരിപ്പിക്കുന്നതിനൊപ്പം ശക്തനായ മതനിരപേക്ഷവാദിയാവുക എന്നതാണ് ആധുനിക കാല ഇന്ത്യയിലും കേരളത്തിലും എടുക്കേണ്ട പ്രതിജ്ഞ'-എ എന്‍ ഷംസീര്‍ പറഞ്ഞു.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
ഇന്ത്യ സെക്യുലര്‍ ആയ രാജ്യമാണെന്നും സെക്കുലര്‍ എന്ന വാക്കിനര്‍ത്ഥം, മതനിരാസം എന്നല്ല, മതനിരപേക്ഷത എന്നാണെന്നും ഷംസീര്‍ പറഞ്ഞു. 'രാഷ്ട്രത്തിന് മതമില്ല. എന്നാല്‍ രാഷ്ട്രത്തിലുളള പൗരന്മാര്‍ക്ക് മതമാകാം. നിങ്ങള്‍ക്ക് നിങ്ങളുടെ മതത്തില്‍ വിശ്വസിക്കാം, മതം പ്രചരിപ്പിക്കാം. അതാണ് ഭരണഘടനയില്‍ പറയുന്നത്. എന്നാല്‍ ഇന്ത്യയെ മതരാഷ്ട്രമാക്കി മാറ്റാനാണ് ഇപ്പോള്‍ ശ്രമം. അതിനുളള സംഘടിതമായ നീക്കം നടക്കുമ്പോള്‍ അതിനെ ചെറുത്തു തോല്‍പ്പിക്കേണ്ടത് മതവിശ്വാസിയുടെയും രാജ്യത്തെ സ്‌നേഹിക്കുന്നവരുടെയും ഉത്തരവാദിത്തമാണ്'- ഷംസീര്‍ കൂട്ടിച്ചേര്‍ത്തു.
