ഡെറാഡൂണ്‍: ഉത്തരാഖണ്ഡില്‍ ഹിമപാതത്തെത്തുടര്‍ന്ന് അളകനന്ദ നദി കരകവിഞ്ഞു. ചമോലി ജില്ലയിലാണ് നദി കരകവിഞ്ഞൊഴുകുന്നത്. പ്രളയസാധ്യതയുളളതിനാല്‍ സംസ്ഥാനത്ത് ജാഗ്രതാ നിര്‍ദേശം പുറപ്പെടുവിപ്പിച്ചിട്ടുണ്ട്. ജനങ്ങള്‍ പരിഭ്രാന്തരാകേണ്ട സാഹചര്യമില്ലെന്ന് മുഖ്യമന്ത്രി ത്രിവേന്ദ്ര സിംഗ് റാവത്ത് പറഞ്ഞു.
ഋഷിഗംഗ പവര്‍ പ്രോജക്ടിനടക്കം ജലവൈദ്യുത നിലയങ്ങള്‍ക്ക് കേടുപാടുകളുണ്ടായതായും റിപ്പോര്‍ട്ടുകളുണ്ട്. പെട്ടെന്നുണ്ടായ വെളളപ്പൊക്കത്തില്‍ നൂറ്റിയമ്പതിലധികം പേര്‍ മരണപ്പെട്ടിരിക്കാന്‍ സാധ്യതയുണ്ടെന്ന് ഉത്തരാഖണ്ഡ് സംസ്ഥാന ചീഫ് സെക്രട്ടറി ഓം പ്രകാശ് പറഞ്ഞു. ദേശീയ ദുരന്ത നിവാരണ സേനയുടെ അഞ്ചും ഇന്തോ ടിബറ്റന്‍ ബോര്‍ഡര്‍ പോലീസിന്റെ രണ്ടും ടീമുകളെ സംസ്ഥാന ദുരന്തനിവാരണ സേനയോടൊപ്പം രക്ഷാപ്രവര്‍ത്തനങ്ങള്‍ക്കായി വിന്യസിച്ചിട്ടുണ്ട്.
വിഷ്ണുപ്രയാഗ്, ജോഷിമത്ത്, കര്‍ണപ്രയാഗ്, രുദ്രപ്രയാഗ്, ഋഷികേശ്, ഹരിദ്വാര്‍ എന്നിവിടങ്ങളില്‍ നിന്നുളള ജനങ്ങള്‍ നദീ തീരങ്ങളിലേക്ക് പോകരുതെന്ന് മുന്നറിയിപ്പുണ്ട്. സ്ഥിതിഗതികള്‍ അവലോകനം ചെയ്യുന്നുണ്ടെന്നും മുഖ്യമന്ത്രിയോടും മറ്റു ഉദ്യോഗസ്ഥരുമായും സംസാരിക്കുന്നുണ്ടെന്നും പ്രധാനമന്ത്രി അറിയിച്ചു.
