2011-ല്‍ തുടങ്ങി കഴിഞ്ഞ എട്ടു വര്‍ഷത്തോളം ലോകം കീഴടക്കിയ പ്രശസ്ത അമേരിക്കൻ ഫാന്റസി ടെലിവിഷൻ പരമ്പരയായ ഗെയിം ഓഫ് ത്രോൺസിലെ 'ഓഡിൻ' എന്ന നോർത്തേൺ ഇൻയൂട്ട് ഡോഗ് മരിച്ചു. പ്രധാന കഥാപാത്രങ്ങളില്‍ ഒന്നായ ബ്രാൻ സ്റ്റാർക്കിന്റെ ഡയര്‍ വൂള്‍ഫായിരുന്നു ഓഡിൻ. സാധാരണ ചാര നിറത്തിലുള്ള ചെന്നായയുടെ പലമടങ്ങ് വലുപ്പമുള്ള പുരാണങ്ങളില്‍ പറയുന്ന വൂള്‍ഫാണ് പരമ്പരയില്‍ അവതരിപ്പിക്കപ്പെട്ട ഡയര്‍ വൂള്ള്‍‍ഫുകള്‍. ആദ്യ സീസണുകളിൽ യഥാര്‍ത്ഥ ചെന്നായകളെ ഉപയോഗിച്ചായിരുന്നു ഷൂട്ടിംഗ്. എന്നാല്‍, പിന്നീടുള്ള സീസണുകളിൽ, ഡയറർ‌വൂൾ‌വുകൾ പൂർണ്ണമായും കമ്പ്യൂട്ടർ ജനറേറ്റഡ് ആയിരുന്നു. ഓഡിന്‍റെ ഉടമയാണ് മരണവിവരം ഇന്‍സ്റ്റഗ്രാമിലൂടെ പുറത്തുവിട്ടത്.
അമേരിക്കൻ എഴുത്തുകാരൻ ജോർജ് ആർ ആർ മാർട്ടിന്റെ എ സോങ് ഓഫ് ഐസ് ആൻഡ് ഫയർ പരമ്പരയെ ആസ്പദമാക്കി എച്ച് ബി ഒ നിർമ്മിച്ച ടെലിവിഷൻ പരമ്പരയാണ് ഗെയിം ഓഫ് ത്രോൺസ്. ഡേവിഡ് ബെനിയോഫ്, ഡിബി വെയ്‌സ് എന്നിവർ ചേർന്നാണ് പരമ്പരക്ക് രൂപം നൽകിയത്. 2011 ഏപ്രിൽ 17-ന് പ്രദർശനമാരംഭിച്ച ഗെയിം ഓഫ് ത്രോൺസ് മേക്കിംഗും കഥാകഥന രീതിയും കൊണ്ടാണ് ശ്രദ്ധിക്കപ്പെട്ടത്. അതേ സമയം, നഗ്നതയുടെയും ലൈംഗികതയുടെയും അക്രമത്തിൻ്റെയും അതിപ്രസരം ചെറുതല്ലാത്ത വിമർശനങ്ങളും വിളിച്ചു വരുത്തിയിട്ടുണ്ട്.
