കൊവിഡ് രോഗ പരിശോധനക്ക് തിരുവനന്തപുരം ശ്രിചിത്ര മെഡിക്കൽ ഇൻസ്റ്റിറ്റ്യൂട്ട് ആധുനിക കിറ്റ് വികസിപ്പിച്ചു. വൈറസ് ബാധ 100 ശതമാനം കൃത്യതയോടെ കണ്ടെത്താനാകുമെന്നാണ് കിറ്റിന്റെ പ്രത്യേകത. 10 മിനുട്ട് കൊണ്ട് ഫലം പുതിയ രീതിയിലൂടെ ലഭിക്കും. സ്രവം എടുക്കുന്നത് ഉൾപ്പെടെ പരിശോധനക്ക് രണ്ട് മണിക്കൂറിൽ താഴെ മാത്രമെ സമയം വേണ്ടിവരുകയുള്ളു. ലോകത്ത് ആദ്യമായാണ് ഇത്രയും വേഗത്തിൽ പരിശോധനക്കുള്ള സംവിധാനം കണ്ടെത്തുന്നത്. വ്യവസായികാടിസ്ഥാനത്തിൽ കിറ്റ് ഉടൻ ഉത്പാദിപ്പിക്കും.
ചുരുങ്ങിയ ചെലവിൽ പരിശോധന നടത്താമെന്നതാണ് പുതിയ കിറ്റിന്റെ മറ്റൊരു നേട്ടം. 30 സാമ്പിളുകൾ പരിശോധിക്കാൻ പതിനായിരം രൂപയിൽ താഴെയാണ് ചെലവ് വരുക. വൈറസിലെ എന്‍ ജീന്‍ കണ്ടെത്തി പരിശോധിക്കുക. ഇതിലൂടെ വൈറസിന്റെ 2 മേഖലകള്‍ കണ്ടെത്താനാകും. ഇതിനാല്‍ വൈറസിന് ജനിതക മാറ്റം സംഭവിച്ചിട്ടുണ്ടെങ്കിലും ഫലം കൃത്യമായിരിക്കും. ഒരു മെഷീനിൽ ഒരേസമയം 30 സാമ്പിളുകൾ വരെ പരിശോധിക്കാനാകും. പരീക്ഷാർത്ഥം നടത്തിയ പരിശോധനയിൽ പുതിയ കിറ്റ് നൂറു ശതമാനം കൃത്യതയാണ് രേഖപ്പെടുത്തിയത്. ഉടൻ ഈ കിറ്റ് വഴിയുള്ള പരിശോധന ആരംഭിക്കും.
