ഇന്ത്യയിൽ കോവിഡ് രോഗികളുടെ എണ്ണം 13,000 കടന്നു. കേന്ദ്ര ആരോഗ്യ കുടുംബക്ഷേമ മന്ത്രാലയം വെള്ളിയാഴ്ച പുറത്തുവിട്ട കണക്കുകൾ പ്രകാരം കഴിഞ്ഞ 24 മണിക്കൂറില് 1007 പേര്ക്ക് രോഗം സ്ഥിരീകരിച്ചു. 437 പേരാണ് ഇതുവരെ മരിച്ചത്. കഴിഞ്ഞ 24 മണിക്കൂറിനിടെ മാത്രം 23 പേര് മരണപ്പെട്ടു. രാജ്യതലസ്ഥാനത്ത് രോഗബാധിതരുടെ എണ്ണം 1640 ആയി. മഹാരാഷ്ട്രയിൽ കോവിഡ് ബാധിതരുടെ എണ്ണം 3000 കടന്നത് ആശങ്കയോടെയാണ് രാജ്യം ഉറ്റുനോക്കുന്നത്.
മധ്യപ്രദേശിലെ ഇൻഡോറിൽ മരണനിരക്ക് ഉയരുകയാണ്. എട്ട് പേർ കൂടി മരിച്ചതോടെ മരണസംഖ്യ 47 ൽ എത്തി. രാജസ്ഥാനിലും ഗുജറാത്തിലും കർണാടകയിലും തമിഴ്നാട്ടിലും രോഗവ്യാപനം രൂക്ഷമാണ്. തമിഴ്നാട്ടിൽ രോഗികളുടെ എണ്ണം 1,267 ആയി ഉയര്ന്നു. മധ്യപ്രദേശിൽ 55 പേർ ഇതുവരെ മരിച്ചു. രോഗബാധിതരുടെ എണ്ണം 1,164. അതേസമയം, രാജ്യത്ത് കൊവിഡ് പരിശോധനയുടെ എണ്ണം മൂന്ന് ലക്ഷം പിന്നിട്ടു. 3,02,956 പരിശോധനകളാണ് ഇതുവരെ നടത്തിയത്. ഇന്നലെ 27,256 സാമ്പിളുകൾ പരിശോധിച്ചതിൽ 1206 പോസിറ്റീവ് കേസുകൾ സ്ഥിരീകരിച്ചു. രാജ്യത്ത് 1,749 പേർ രോഗമുക്തരായിട്ടുമുണ്ട്.