അമേരിക്കയില് 1,780 മരണം
അമേരിക്കയില് കഴിഞ്ഞ 24 മണിക്കൂറിനുള്ളില് 1,780 പേരാണ് മരണപ്പെട്ടത്. ഇന്നുള്പ്പെടെ കഴിഞ്ഞ മൂന്നു ദിവസങ്ങളിലായി ആയിരത്തി അഞ്ഞൂറിനും രണ്ടായിരത്തിനുമിടയിലാണ് അമേരിക്കയിലെ ദിനംപ്രതിയുള്ള മരണനിരക്ക്. ഇത് താരതമ്യേന ശനിയാഴ്ച്ചക്ക് മുന്പുള്ള മരണനിരക്കിനേക്കാള് കുറവാണ്.
ശനിയാഴ്ചക്ക് മുന്പുള്ള മൂന്നു ദിവസങ്ങളിലും 2500 മുകളിലും തൊട്ടുതാഴേയുമായി രോഗികള് മരണപ്പെട്ടു. ഇന്നലെയും ഇന്നും താരതമ്യേന മരണനിരക്ക് കുറവാണ് രേഖപ്പെടുത്തിയിരിക്കുന്നത്. ഇന്നലത്തെ നിരക്കില് നിന്ന് 237 ന്റെ വര്ദ്ധനവാണ് കഴിഞ്ഞ 24 മണിക്കൂറിനുള്ളില് രേഖപ്പെടുത്തിയിരിക്കുന്നത്.
അതേസമയം ലോകത്തെ മറ്റെല്ലാ രാഷ്ട്രങ്ങളെയും അപേക്ഷിച്ച് കോവിഡ്-19 മൂലമുള്ള മരണനിരക്ക് അമേരിക്കയില് നിയന്ത്രണാതീതമായിത്തന്നെ തുടരുകയാണ്. ഏറ്റവും പുതിയ കണക്കനുസരിച്ച് 42,514 പേര് ഇതിനകം മരണപ്പെട്ടു. 7,92,759 പേര്ക്ക് രോഗം സ്ഥിരീകരിച്ചിട്ടുണ്ട്. കഴിഞ്ഞ ആഴ്ചയില് മരണനിരക്കില് നേരിയ കുറവ് രേഖപ്പെടുത്തിയിരുന്നുവെങ്കിലും ശനിയാഴ്ച വരെയുള്ള നാല് ദിവസങ്ങളില് വലിയ വര്ദ്ധനവാണ് മരണസംഖ്യയില് ഉണ്ടായത്. എന്നാല് കഴിഞ്ഞ 72 മണിക്കൂറിനുള്ളില് വന്ന റിപ്പോര്ട്ടുകള് ആശ്വാസം നല്കുന്നതാണ്.
രോഗം സ്ഥിരീകരിച്ചവര് 25,373 ( കഴിഞ്ഞ 24 മണിക്കൂറിനുള്ളില് )
ഏറ്റവും പുതിയ കണക്കനുസരിച്ച് അമേരിക്കയില് പുതുതായി 25,373 പേര്ക്കാണ് രോഗം സ്ഥിരീകരിച്ചിരിക്കുന്നത്. ഇതോടെ രാജ്യത്തെ ആകെ കോവി ഡ്-19 രോഗികളുടെ എണ്ണം മുകളില് സൂചിപ്പിച്ചത് പോലെ 7,92,759 ആയി. തിങ്കളാഴ്ചത്തെ കണക്കനുസരിച്ച് 25,006 പുതിയ രോഗികളാണ് റിപ്പോര്ട്ട് ചെയ്യപ്പെട്ടത്. ഞായറാഴ്ചത്തെ കണക്കനുസരിച്ച് 28,671പേര്ക്കാണ് രോഗം സ്ഥിരീകരിച്ചിരുന്നത്. അതായത് കഴിഞ്ഞ മൂന്നുദിവസങ്ങളിലായി പുതുതായി രോഗം സ്ഥിരീകരിക്കുന്നവരുടെ എണ്ണത്തില് വന് കുറവാണ് രേഖപ്പെടുത്തിക്കൊണ്ടിരിക്കുന്നത്. കാര്യങ്ങള് നിയന്ത്രാതീതമായി തുടരുമ്പോഴും കഴിഞ്ഞ രണ്ടു ദിവസങ്ങളായി അമേരിക്കയില് നിന്നും വന്നുകൊണ്ടിരിക്കുന്ന കണക്കുകള് പ്രതീക്ഷ ജനിപ്പിക്കുന്നതാണ്.
.ന്യൂയോര്ക്കില് 631 മരണം
രാജ്യത്ത് ഏറ്റവും കൂടുതല് മരണം റിപ്പോര്ട്ട് ചെയ്യപ്പെട്ട ന്യൂയോര്ക്കില് മരണസംഖ്യ18,929 ആയി. ശനിയാഴ്ചയിലെ റിപ്പോര്ട്ട് പ്രകാരം ആയിരത്തിനു മുകളിലായിരുന്നു മരണനിരക്ക്. ഇതുമായി താരതമ്യപ്പെടുത്തുമ്പോള് കഴിഞ്ഞ 72 മണിക്കൂറിനുള്ളിലെ നിരക്ക് ആശ്വാസം പകരുന്നതാണ്. ഇവിടെ മാത്രം 2,52,094 പേര്ക്ക് രോഗബാധ സ്ഥിരീകരിച്ചു.
4,377 പേര് മരണമടഞ്ഞ ന്യൂ ജെഴ്സിയാണ് മരണ - രോഗ നിരക്കില് തൊട്ടുപിറകില് നില്ക്കുന്നത്. ഇവിടെ ഇതുവരെ 88,806 പേര്ക്ക് രോഗം സ്ഥിരീകരിച്ചിട്ടുണ്ട്. 1,223 പേര് മരണമടഞ്ഞ കാലിഫോര്ണിയയില് 33,686 - പേര്ക്ക് രോഗം സ്ഥിരീകരിച്ചിട്ടുണ്ട്. 32,000- പേര്ക്ക് രോഗം സ്ഥിരീകരിച്ച മിഷിഗണില് 2,468 പേര് മരണപ്പെട്ടു. ഫ്ലോറിഡ -823 മസ്സാച്ചുസെറ്റ്സ് -1,809, ലൂസിയാന -1,328, ഇല്ലിനോയിസ് -1,349, ജോര്ജ്ജിയ -775 എന്നിങ്ങനെയാണ് ഏറ്റവും പുതിയ മരണ നിരക്ക്.
തലസ്ഥാനമായ വാഷിങ്ങ്ടണില് മരണ-രോഗീ നിരക്ക് രാജ്യത്തെ മറ്റു നഗരങ്ങളുമായി താരതമ്യം ഇല്ലാത്ത വിധം കുറവാണ്. ഇതുവരെ 12,085 പേര്ക്ക് രോഗം സ്ഥിരീകരിച്ച ഇവിടെ ഇതിനകം 652 പേരാണ് മരണപ്പെട്ടത്.
ശനിയാഴ്ച വരെയുള്ള കഴിഞ്ഞ തൊണ്ണൂറ്റിനാലു മണിക്കൂറിനുള്ളില് എല്ലാ സംസ്ഥാനങ്ങളിലും മരണനിരക്കില് വന് കുതിച്ചുചാട്ടമാണ് നടന്നത്. അതുമായി താരതമ്യം ചെയ്യുമ്പോള് കഴിഞ്ഞ 72 മണിക്കൂറിനുള്ളില് യുണൈറ്റഡ് സ്റ്റേറ്റ്സിലെ എല്ലാ സംസ്ഥാനങ്ങളിലും മരണനിരക്ക് ഗണ്യമായ നിലയില് കുറഞ്ഞിട്ടുണ്ട്. എന്നിരുന്നാലും രാജ്യത്ത് സ്ഥിതിഗതികള് അതീവ ഗുരുതരമായി തുടരുകയാണ്.