ഇന്ത്യയില്‍ 1,486 പുതിയ കൊറോണ വൈറസ് കേസുകൾ രജിസ്റ്റർ ചെയ്തു. ഇതോടെ മൊത്തം രോഗികളുടെ എണ്ണം 20,471 ആയി ഉയര്‍ന്നു. കഴിഞ്ഞ 24 മണിക്കൂറിനുള്ളിൽ 49 പേർ കൂടി മരിച്ചു. മൊത്തം മരണസംഖ്യ 652 ആയി ഉയർന്നതായും ആരോഗ്യ മന്ത്രാലയം അറിയിച്ചു. 19.36 ശതമാനം (618 രോഗികൾ) പേര്‍ രോഗമുക്തിനേടി. മഹാരാഷ്ട്രയിൽ 553 പേർക്കും രാജസ്ഥാനിൽ 133 പേർക്കും ഗുജറാത്തിൽ 94 പേർക്കും പുതിയതായി രോഗം കണ്ടെത്തി.
ഏപ്രിൽ 2 ന് 211 പേര്‍ക്കു മാത്രം സ്ഥിരീകരിച്ച കൊവിഡ് ഇപ്പോൾ 403 ജില്ലകളിലേക്ക് വ്യാപിച്ചു. ആറ് പ്രധാന നഗരങ്ങളിലാണ് 45 ശതമാനം കേസുകളും റിപ്പോര്‍ട്ട് ചെയ്യപ്പെട്ടത്. മൂവായിരത്തിലധികം കേസുകളിലാണ് മുംബൈ-യാണ് ഒന്നാം സ്ഥാനത്ത്. ഡൽഹി 2,081, അഹമ്മദാബാദ് 1,298, ഇൻഡോർ 915, പൂനെ 660, ജയ്പൂർ 537 എന്നീ നഗരങ്ങളിലും രോഗികളുടെ എണ്ണം ഉയരുകയാണ്. മഹാരാഷ്ട്ര, ഗുജറാത്ത്, ദില്ലി, രാജസ്ഥാൻ, തമിഴ്‌നാട് എന്നീ അഞ്ചു സംസ്ഥാനങ്ങളിലാണ് 60 ശതമാനത്തിലധികം കേസുകളും റിപ്പോര്‍ട്ട് ചെയ്തിരിക്കുന്നത്.
