മുംബൈ: ഷാറൂഖ് ഖാന് പ്രധാന കഥാപാത്രമായി എത്തുന്ന ജവാന് സിനിമയുടെ റിലീസ് ഇനിയും നീളുമെന്ന് റിപ്പോര്ട്ട്. തമിഴ് സംവിധായകൻ ആറ്റ്ലി ആദ്യമായി ഒരുക്കുന്ന ബോളിവുഡ് ചിത്രമാണ് ജവാൻ. ചിത്രത്തിൽ ഷാരൂഖിന്റെ നായികയായി എത്തുന്നത് നയൻതാരയാണ്. സിനിമയുമായി ബന്ധപ്പെട്ട അപ്ഡേറ്റുകൾക്ക് പ്രേക്ഷകരും ഏറെയാണ്. സിനിമയുടെ റിലീസുമായി ബന്ധപ്പെട്ട വാര്ത്തകളാണ് ഇപ്പോള് പുറത്തുവരുന്നത്.
ജൂണ് രണ്ടിന് സിനിമ റിലീസ് ചെയ്യുമെന്നാണ് അണിയറപ്രവര്ത്തകര് നേരത്തെ അറിയിച്ചിരുന്നത്. സിനിമയുടെ ഷൂട്ടിംഗ് ഇതുവരെ പൂര്ത്തിയായിട്ടില്ലെന്നും അതിനാല് ജവാന്റെ റിലീസ് ഒക്ടോബറിലേക്ക് നീളുമെന്നുമാണ് അനൌദ്യോഗിക റിപ്പോര്ട്ട്. ഇത് സംബന്ധിച്ച് നിര്മ്മാതാക്കളുടെ ഭാഗത്തുനിന്ന് വൈകാതെ പ്രഖ്യാപനം വരുമെന്നാണ് മാധ്യമങ്ങള് റിപ്പോര്ട്ട് ചെയ്യുന്നത്.
നയന്താര നായികയായി എത്തുന്ന ജവാന്റെ ടീസറിന് മികച്ച പ്രതികരണമാണ് ലഭിച്ചത്. നയന് താര അന്വേഷണ ഉദ്യോഗസ്ഥയായാണ് ചിത്രത്തിലെത്തുന്നത്. ജവാനില് ഷാറൂഖ് ഖാന് ഇരട്ടവേഷത്തിലാണ് അഭിനയിക്കുന്നതെന്നാണ് റിപ്പോര്ട്ട്. ജവാന് ആക്ഷന് ഡ്രാമ വിഭാഗത്തില് ഉള്പ്പെടുന്ന സിനിമയാണ്. 'റോ'യിലെ (റിസര്ച്ച് ആന്ഡ് അനാലിസിസ് വിംഗ്) ഒരു മുതിര്ന്ന ഉദ്യോഗസ്ഥനായ അച്ഛന്റെയും ഗ്യാങ്സ്റ്ററായ മകന്റെയും കഥയാണ് സിനിമയുടെ ഇതിവൃത്തം.
ഹിന്ദിക്ക് പുറമെ തമിഴ്, തെലുങ്ക്, മലയാളം, കന്നഡ ഭാഷകളില് പാന് ഇന്ത്യന് റിലീസ് ആയാണ് ജവാന് പ്രേക്ഷകര്ക്ക് മുന്പില് എത്തുക. ഷാറൂഖാന്റെ തികച്ചും വ്യത്യസ്തമായ ലുക്കാണ് ഈ ചിത്രത്തില് കാണാന് സാധിക്കുകയെന്ന് സംവിധായകന് ആറ്റ്ലി നേരത്തെ പറഞ്ഞിരുന്നു. റെഡ് ചില്ലീസ് എന്റർടെയ്ൻമെന്റിന്റെ ബാനറിൽ ഗൗരി ഖാൻ ആണ് നിർമാണം.