ഡല്‍ഹി: മൊബൈല്‍ പെയ്മെന്‍റ് ആപ്ലിക്കേഷനായ ഗൂഗിള്‍ പേയില്‍ ആധാര്‍ കാര്‍ഡ് ഉപയോഗിച്ച് ഇനി മുതല്‍ പെയ്മെന്‍റ് നടത്താം. ഉപഭോക്താക്കൾക്ക് ആധാർ നമ്പർ ഉപയോഗിച്ച് യു.പി.ഐയിൽ രജിസ്റ്റര്‍ ചെയ്യാനുള്ള സംവിധാനമാണ് നാഷണല്‍ പേയ്മെന്‍റ് കോര്‍പ്പറേഷന്‍ ഒരുക്കിയിരിക്കുന്നത്. ഇതിലൂടെ ഗൂഗിള്‍ പേ ഉപയോക്താകള്‍ക്ക് ആധാര്‍ നമ്പര്‍ ഉപയോഗിച്ച് യു പി ഐ സേവനങ്ങള്‍ക്ക് രജിസ്റ്റര്‍ ചെയ്യാം.
നിലവിൽ ചില ബാങ്കുകൾ മാത്രമാണ് ഈ സേവനം നൽകുന്നത്.വരും ദിവസങ്ങളിൽ കൂടുതൽ ബാങ്കുകൾ ഈ സേവനം ലഭ്യമാക്കുമെന്ന് അധികൃതര്‍ അറിയിച്ചു. ഈ സേവനം ലഭ്യമാകണമെങ്കില്‍ ആധാർ നമ്പര്‍ ബാങ്ക് അക്കൗണ്ടുമായി ബന്ധിപ്പിച്ചിരിക്കണം. അതോടൊപ്പം ബാങ്കിലും ആധാർ സൈറ്റിലും രജിസ്റ്റർ ചെയ്ത ഫോൺ നമ്പർ ഒന്നായിരിക്കണം. എങ്കില്‍ മാത്രമേ പുതിയ ഫീച്ചര്‍ ഉപയോഗിക്കാന്‍ സാധിക്കുകയുള്ളൂ.
മൊബൈലില്‍ ഗൂഗിൾ പേ ആപ്പ് ഓപ്പൺ ചെയ്ത് യു പി ഐ ഓപ്ഷനിൽ ആധാർ അടിസ്ഥാനമാക്കിയുള്ള യു പി ഐ ഓൺബോർഡിംഗ് തെരഞ്ഞെടുക്കുക. ശേഷം ആധാർ നമ്പറിന്റെ ആദ്യ ആറ് അക്കങ്ങൾ നൽകണം. തുടർന്ന് ലഭിക്കുന്ന ഒ ടി പി ഉപയോഗിച്ച് രജിസ്‌ട്രേഷൻ പൂർത്തിയാക്കാം. ഇതിന് ശേഷം യു പി ഐ പിൻ സെറ്റ് ചെയ്യാന്‍ സാധിക്കും. ഈ പ്രോസസ് പൂര്‍ത്തിയായി കഴിഞ്ഞാല്‍ ഉപയോകതാക്കള്‍ക്ക് പണമിടപാടുകള്‍ നടത്താന്‍ സാധിക്കും.
