ഡല്ഹി: രാജ്യത്ത് കൊവിഡ്-19 ടെസ്റ്റുകള് അടിയന്തിരമായി നടത്തേണ്ടത് പൊതു ജനങ്ങളുമായി നിരന്തര സമ്പര്ക്കം പുലര്ത്തുന്ന ജോലികളില് ഏര്പ്പെടുന്നവരെയാണ് എന്ന് ഐസിഎംആര്. മാറിയ സാഹചര്യത്തില് തങ്ങള് നേരത്തെ ഇറക്കിയ മാനദണ്ഡങ്ങളില് മാറ്റം വരുത്തിക്കൊണ്ടാണ് ഐസിഎംആര് പുതിയ നിര്ദ്ദേശം മുന്നോട്ടു വെച്ചിരിക്കുന്നത്. ഇതുപ്രകാരം പൊതു വാഹനങ്ങളിലെ ഡ്രൈവര്മാര്, സെക്യുരിറ്റി സ്റ്റാഫുകള്, ചെക്ക് പൊയന്റുകളിലെ പൊലിസ് ഉദ്യോഗസ്ഥന്മാര്, ജനങ്ങള് നേരിട്ട് സാധനങ്ങള് വാങ്ങിക്കുന്ന കടകളിലെ വ്യാപാരികള്, വഴി വാണിഭക്കാര്, റെയില്വേ, എയര്പോര്ട്ട് തുടങ്ങിയ ഇടങ്ങളിലെ ജീവനക്കാര് എന്നിവര്ക്ക് ആദ്യം കൊവിഡ്-19 ടെസ്റ്റുകള് നടത്തണം.
നേരത്തെ ഇറക്കിയ നിര്ദ്ദേശ പ്രകാരം ആരോഗ്യ രംഗത്ത് പ്രവര്ത്തിക്കുന്നവര്, രോഗികളുമായി ഇടപഴകുന്ന ഡോക്ടര്മാര്, നഴ്സുമാര്, ഫാര്മസിസ്റ്റുകള്, സന്നദ്ധ പ്രവര്ത്തര് തുടങ്ങിയ വിഭാഗങ്ങള്ക്കായിരുന്നു പ്രാമുഖ്യം. ഇനി ഇവര്ക്കൊപ്പം പുതുതായി കൂട്ടിച്ചേര്ത്ത വിഭാഗങ്ങളെ കൂടി അടിയന്തിര പ്രാധാന്യത്തോടെ പരിശോധനക്ക് വിധേയമാക്കാനാണ് ഐസിഎംആര് നിര്ദ്ദേശം നല്കിയിരിക്കുന്നത്.
ഐസിഎംആറിന്റെ പുതിയ നിര്ദ്ദേശം രോഗവ്യാപനം ശക്തമായ സാഹചര്യത്തിലാണ് എന്നത് ശ്രദ്ധേയമാണ്. നഗര കേന്ദ്രീകൃതമായാണ് രാജ്യത്ത് രോഗ വ്യാപനം നടക്കുന്നത്. ഈ സാഹചര്യത്തില് സാമൂഹ്യ വ്യാപന സാദ്ധ്യതകൂടി കണക്കിലെടുത്താണ് ഐസിഎംആര് പുതിയ നിര്ദ്ദേശം മുന്നോട്ടു വെച്ചിരിക്കുന്നത്.