കൊവിഡ് 19 പ്രതിരോധ പ്രവർത്തനങ്ങളിൽ നോർത്ത് കൊറിയ തിളക്കമാര്ന്ന വിജയം വിജയം കൈവരിച്ചതായി കിം ജോങ് ഉൻ. പോളിറ്റ് ബ്യുറോ മീറ്റിംഗിനിടെ രോഗവ്യാപനം അവസാനിച്ചതായും രാജ്യം സ്ഥിരാവസ്ഥ കൈവരിച്ചതായും കിം അറിയിച്ചു.
ആറ് മാസം മുൻപാണ് രാജ്യതലസ്ഥാനമായ പ്യോങ്യാങിൽ രോഗലക്ഷണങ്ങളുള്ള ആയിരങ്ങളെ ഐസൊലേഷനിലാക്കുകയും രാജ്യത്തിന്റെ അതിർത്തി അടക്കുകയും ചെയ്തത്. നൂറ് കണക്കിന് വിദേശികളെ ക്വാറന്റൈനിൽ പ്രവേശിപ്പിക്കുകയും സ്കൂളുകളടക്കം പൊതു സ്ഥാപനങ്ങളെല്ലാം അടച്ചിടുകയും ചെയ്തിരുന്നു. മാസങ്ങളായുള്ള പ്രതിരോധ പ്രവർത്തനങ്ങൾക്കൊടുവിൽ രാജ്യം പൂർണമായും കോവിഡ് മുക്തമാണെന്നും ഇത് ദീർഘവീക്ഷണമുള്ള കേന്ദ്ര പാർട്ടി കമ്മിറ്റിയുടെ വിജയമാണെന്നും മീറ്റിംഗിൽ അദ്ദേഹം പറഞ്ഞു. അയൽ രാജ്യങ്ങൾ ഇപ്പോഴും കോവിഡ് ഭീഷണിയിൽ ആയതിനാൽ ജനങ്ങൾ ജാഗ്രതയോടെ പ്രവർത്തിക്കണമെന്നും അദ്ദേഹം കൂട്ടിച്ചേർത്തതായി നോർത്ത് കൊറിയൻ ന്യൂസ് ഏജൻസി KCNA അറിയിച്ചു.
നോർത്ത് കൊറിയ പൂർണമായും കോവിഡ് മുക്തമാണെന്ന പ്രസ്താവനയെ മാധ്യമങ്ങളും ശാസ്ത്രജ്ഞരും സംശയത്തോടെയാണ് നോക്കികാണുന്നത്. ചൈനയുമായി വ്യാപാരം പങ്കിടുന്ന രാജ്യം പൂർണമായും രോഗമുക്തമാവാൻ സാധ്യതയില്ലെന്നും പക്ഷെ നേരത്തെ തന്നെ കൈകൊണ്ട പ്രതിരോധ പ്രവർത്തനങ്ങൾ കാരണം രോഗവ്യാപനം നല്ല രീതിയിൽ കുറക്കാൻ അവർക്ക് സാധിച്ചിരിക്കുമെന്നും മാധ്യമങ്ങൾ പ്രതികരിച്ചു.