തിരുവനന്തപുരം: സംസ്ഥാനത്തെ സര്‍ക്കാര്‍ - സ്വകാര്യ സ്ഥാപനങ്ങളില്‍ ഇന്ന് മുതല്‍ 25% ജോലിക്കാര്‍ മാത്രം എത്തിയാല്‍ മതിയെന്ന് ഉത്തരവ്. ബാക്കിയുള്ള ജീവനകാര്‍ വീട്ടില്‍ ഇരുന്ന് വര്‍ക്ക്‌ ഫ്രം ഹോം സംവിധാനത്തിലൂടെ ജോലി ചെയ്യണമെന്നും സര്‍ക്കാര്‍ നിര്‍ദേശിച്ചു. കൊവിഡ് വ്യാപനം രൂക്ഷമാകുന്ന സാഹചര്യത്തിലാണ് പുതിയ തീരുമാനം. ഇന്ന് മുതല്‍ നിയന്ത്രണങ്ങള്‍ പ്രാബല്യത്തില്‍ വരും.
അവശ്യ സര്‍വീസ് ഒഴികെ ബാക്കിയുള്ള എല്ലാ സര്‍വീസുകള്‍ക്കും നിയന്ത്രണം ഏര്‍പ്പെടുത്തിയിട്ടുണ്ട്. അവശ്യ സേവനവുമായി ബന്ധപ്പെട്ട് പ്രവര്‍ത്തിക്കുന്ന സ്ഥാപനങ്ങള്‍, സംഘടനകള്‍, വ്യവസായ സ്ഥാപനങ്ങള്‍ എന്നിവക്ക് 24 മണിക്കൂറൂം പ്രവര്‍ത്തിക്കാന്‍ സാധിക്കും. ഈ സ്ഥാപനങ്ങളിലെ ജീവനകാര്‍ക്ക് ഐഡി കാര്‍ഡുകള്‍ ഉപയോഗിച്ച് യാത്രകള്‍ അനുവദനീയമാണ്.
ടെലികോം, എല്‍.പി.ജി യൂണിറ്റുകള്‍, ഇന്റര്‍നെറ്റ്‌ സേവന ദാതാക്കള്‍ എന്നിവരെ ആവിശ്യ വിഭാഗത്തില്‍ ഉള്‍പ്പെടുത്തിയിട്ടുണ്ട്. രോഗികള്‍ക്കും, കൂടെയുള്ള സഹായികള്‍ക്കും, വാക്സിന്‍ സ്വീകരിക്കാന്‍ പോകുന്നവര്‍ക്കും ഐഡി കാര്‍ഡ്‌ കാണിച്ചാല്‍ യാത്ര അനുവദിക്കും. എല്ലാ സ്ഥാപനങ്ങളിലെ ജോലിക്കാരും ഇരട്ട മാസ്കുകള്‍ ഉപയോഗിക്കണം. റേഷന്‍ കടകള്‍ തുറന്ന് പ്രവര്‍ത്തിക്കും. ബാങ്കുകള്‍ രാവിലെ 10 മണി മുതല്‍ 1 മണിവരെ മാത്രമേ പ്രവര്‍ത്തനം അനുവദിക്കുകയുള്ളൂ.
