കൊച്ചി: മഞ്ജു വാര്യറെ കേന്ദ്രകഥാപാത്രമാക്കി നവാഗതനായ ആമിര് പള്ളിക്കല് സംവിധാനം ചെയ്യുന്ന 'ആയിഷ' എന്ന ചിത്രത്തില് രാധികയും. കഴിഞ്ഞ ദിവസമാണ് രാധിക അവതരിപ്പിക്കുന്ന നിഷ എന്ന കഥാപാത്രത്തെ പരിചയപ്പെടുത്തി അണിയറപ്രവര്ത്തകര് ക്യാരക്ടര് പോസ്റ്റര് പുറത്തുവിട്ടത്. രാധികയെ പുതിയ ഭാവത്തിലും വേഷപകര്ച്ചയിലുമാണ് പോസ്റ്ററില് കാണാന് സാധിക്കുക. ഇൻഡോ - അറബിക് മോഡില് ഒരുക്കുന്ന 'ആയിഷ'യുടെ പുതിയ അപ്ഡേഷനുകള്ക്കെല്ലാം വലിയ സ്വീകാര്യതയാണ് ലഭിക്കുന്നത്.
അടുത്തിടെ സിനിമയുടെ സോംഗ് ടീസർ റീലീസായിരുന്നു. മഞ്ജു വാര്യരുടെ ജന്മദിനം പ്രമാണിച്ചാണ് 'കണ്ണിലെ കണ്ണിലെ' എന്ന ഗാനത്തിന്റെ ടീസര് പുറത്തുവിട്ടത്. പ്രഭുദേവയാണ് ഡാൻസ് കൊറിയോഗ്രാഫി നിര്വഹിച്ചിരിക്കുന്നത്. എം ജയചന്ദ്രനാണ് സംഗീത സംവിധായകൻ. നീണ്ട ഇടവേളയ്ക്കു ശേഷമാണ് പ്രഭുദേവ ഒരു മലയാള സിനിമയില് നൃത്ത സംവിധായകനായി എത്തുന്നത്.
മലയാളത്തിന് പുറമെ ഇഗ്ലീഷ്, അറബി, തമിഴ്, തെലുങ്ക്, ഹിന്ദി, കന്നഡ തുടങ്ങി മറ്റനേകം ഭാഷകളിലുമായാണ് ചിത്രം ഒരുങ്ങുന്നത്. ആഷിഫ് കക്കോടിയാണ് ചിത്രത്തിന്റെ രചന. വിജയ് ദേവരകൊണ്ടയുടെ തെലുങ്ക് -ഹിന്ദി ചിത്രമായ 'ലിഗറിനു' ശേഷം വിഷ്ണു ശര്മ്മ ഛായാഗ്രഹണം നിര്വഹിക്കുന്ന മലയാള ചിത്രം കൂടിയാണ് 'ആയിഷ'. ബിഗ് ബജറ്റില് ഒരുങ്ങുന്ന ചിത്രമാണിത്. മലയാളത്തില് ഇത്രയും വലിയ കാന്വാസില് ഒരു സ്ത്രീ കേന്ദ്രീകൃത സിനിമ ആദ്യമായിമായിട്ടാണെന്നാണ് റിപ്പോര്ട്ട്. ക്രോസ് ബോര്ഡര് ക്യാമറയുടെ ബാനറില് സക്കറിയയാണ് നിര്മ്മാണം.
സജ്ന, പൂര്ണിമ, ലത്തീഫ (ടുണീഷ്യ), സലാമ (യുഎഇ), ജെന്നിഫര് (ഫിലിപ്പൈന്സ്), സറഫീന (നൈജീരിയ), സുമയ്യ (യമന്), ഇസ്ലാം (സിറിയ) തുടങ്ങിയ വിദേശ താരങ്ങളും ചിത്രത്തിൽ അണിനിരക്കുന്നുണ്ട്. കൃഷ്ണ ശങ്കറും ഒരു പ്രധാന വേഷത്തില് എത്തുന്നു.