ചെന്നൈ സൂപ്പര് കിംഗ്സിന്റെ അവസാന ഹോം മത്സരത്തിന് ശേഷം നായകന് എം എസ് ധോണിയോട് ഓട്ടോഗ്രാഫ് വാങ്ങി ഇതിഹാസ താരം സുനില് ഗവാസ്കര്. സുനില് ഗവാസ്കറിന്റെ കുപ്പായത്തിലാണ് ധോണി ഓട്ടോഗ്രാഫ് നല്കിയത്. ഇതിന്റെ വീഡിയോ സാമൂഹിക മാധ്യമങ്ങളില് വൈറലായിരിക്കുകയാണ്. 'ഈ കാഴ്ച്ച ഇത് നമ്മുടെ ഹൃദയത്തില് പതിക്കുന്നു' എന്ന് ചിത്രം ഫേസ്ബുക്കില് പങ്കുവെച്ച് ചെന്നൈ സൂപ്പർ കിങ്സ് കുറിച്ചു.
"ധോണി കളി കഴിഞ്ഞ് വരുന്നതിന് മുന്പ് തന്നെ ഞാന് മറ്റൊരാളോട് പേന കടം മേടിച്ച് നില്ക്കുകയായിരുന്നു. ധോണിയെ ആരാണ് സ്നേഹിക്കാത്തത്. അദ്ദേഹം വര്ഷങ്ങളായി ഇന്ത്യന് ക്രിക്കറ്റിന് മികച്ച സംഭാവനകളാണ് നല്കുന്നത്. ധോണിയുടെ പ്രകടനം എപ്പോഴും അതിശയത്തോടെയാണ് നോക്കി കാണുന്നത്. രാജ്യത്തെ യുവാക്കള് ധോണിയെ ആരാധിക്കുന്നുണ്ട്. മികച്ച ക്യാപ്റ്റനാണ് ധോണി" - ഗവാസ്കര് സ്റ്റാര് സ്പോര്ട്സിനോട് പറഞ്ഞു.
ചെന്നൈ ചെപ്പോക്ക് സ്റ്റേഡിയത്തിനു ചുറ്റും നടന്ന് ആരാധകരെ അഭിവാദ്യം ചെയ്യുന്നതിനിടെയാണ് ധോണിയുടെ അടുത്തേക്ക് ഗവാസ്കർ എത്തിയത്. ഓട്ടോഗ്രാഫ് നൽകിയതിനു പിന്നാലെ ഇരുവരും പരസ്പരം ആലിംഗനം ചെയ്തു. അതേസമയം, മത്സരത്തിൽ ചെന്നൈയെ ആറു വിക്കറ്റിന് കൊൽക്കത്ത പരാജയപ്പെടുത്തി.