മഞ്ചേരി പയ്യനാട് സ്വദേശിയുടെ 4 മാസം പ്രായമുള്ള മകള്‍ മരിച്ചത് കൊവിഡ് മൂലമല്ലെന്ന് മാതാപിതാക്കള്‍. ന്യുമോണിയയും ഹൃദയസംബന്ധമായ അസുഖവും ഉണ്ടായിരുന്ന കുഞ്ഞിന് കൃത്യമായ ചികിത്സ ലഭിക്കാതെയാണ്‌ മരിച്ചതെന്ന് പിതാവ് അഷ്റഫും മാതാവ് ആഷിഫയും ആരോപിച്ചു.
കുഞ്ഞിന് കൊവിഡ് ബാധിച്ചെന്ന കണ്ടെത്തല്‍ സാംപിള്‍ പരിശോധനയില്‍ ഉണ്ടായ പിഴവാണെന്നാണ് രക്ഷിതാക്കള്‍ പറയുന്നത്. ആദ്യം നടത്തിയ പരിശോധനയില്‍ പോസിറ്റീവ് ആണെന്നാണ് കണ്ടെത്തിയതെങ്കിലും പിന്നീട് നടത്തിയ പരിശോധനയിലും, മരണത്തിനു ശേഷം നടത്തിയ പരിശോധനയിലും ഫലം നെഗറ്റീവ് ആയിരുന്നു. മാത്രവുമല്ല, കുഞ്ഞിന് എവിടെനിന്നാണ് കൊവിഡ് ബാധിച്ചത് എന്നതു സംബന്ധിച്ച് യാതൊരു വിവരവുമില്ല. കുഞ്ഞിനെ പരിചരിച്ച മാതാവിനോ അടുത്ത ബന്ധുക്കള്‍ക്കോ കൊവിഡ് ഇല്ല. 33 ബന്ധുക്കളുടെ സ്രവം പരിഷിധിച്ചിട്ടും ആര്‍ക്കും കൊവിഡ് കണ്ടെത്തിയിട്ടില്ലെന്നും അവര്‍ പറയുന്നു.
കുഞ്ഞിന്‍റെ പരിശോധനാ ഫലങ്ങള്‍ പലതവണ ആവശ്യപ്പെട്ടിട്ടും നല്‍കിയില്ലെന്നും, പിഴവ് മറച്ചുവക്കാനുള്ള ശ്രമമാണ് ആരോഗ്യവകുപ്പ് നടത്തുന്നതെന്നും മാതാപിതാക്കള്‍ ആരോപിക്കുന്നു. വിഷയത്തില്‍ സമഗ്രമായ അന്വേഷണം വെണമെന്നാണ് അവരുടെ ആവശ്യം. ഏപ്രില്‍ 21-ന് കോഴിക്കോട് മെഡിക്കല്‍ കോളേജില്‍ പ്രവേഷിപ്പിച്ച കുഞ്ഞിന് തൊട്ടടുത്ത ദിവസംതന്നെ കൊവിഡ് സ്ഥിരീകരിച്ചിരുന്നു. 24-നാണ് കുഞ്ഞ് മരിക്കുന്നത്.
