കീം പരീക്ഷയെഴുതിയ ഒരു വിദ്യാർത്ഥിക്ക് കൂടി കൊവിഡ്. തിരുവനന്തപുരം വലിയതുറ സെന്റ്ആന്റണീസ് സ്കൂളിൽ പരീക്ഷയെഴുതിയ പൂന്തുറ സ്വദേശിക്കാണ് കൊവിഡ് സ്ഥിരീകരിച്ചത്. പരീക്ഷയെഴുതന്ന സമയത്ത് കുട്ടിക്ക് രോഗ ലക്ഷണങ്ങൾ ഉണ്ടായിരുന്നില്ല. ഈ മാസം 20 നാണ് ഇവർക്ക് രോഗം സ്ഥിരീകരിച്ചത്. കുട്ടിയുടെ അമ്മക്ക് കൊവിഡ് ബാധിച്ചിരുന്നു. തുടർന്നാണ് കുട്ടയെ പരിശോധിച്ചത്. ഈ മാസം 16 ലെ കീം പരിക്ഷ എഴുതിയ അഞ്ചാമത്തെ വിദ്യാർത്ഥിക്കാണ് കൊവിഡ് സ്ഥിരീകരിക്കുന്നത്.
തിരുവനന്തപുരത്ത് തൈക്കാട് കേന്ദ്രത്തിൽ കീം പരീക്ഷ എഴുതിയ രണ്ട് വിദ്യാർത്ഥികൾക്ക് കൊവിഡ് സ്ഥിരീകരിച്ചിരുന്നു. ഇതിൽ ഒരു കുട്ടിക്ക് രോഗ ലക്ഷണം ഉള്ളതിനാൽ പ്രത്യേക മുറിയിൽ ഇരുന്നാണ് പരീക്ഷ എഴുതിയത്. അതേ സമയം രണ്ടാമത്തെ വിദ്യാർത്ഥി മറ്റ് കുട്ടികൾക്ക് ഒപ്പമാണ് ഇരുന്നത്. ഈ ക്ലാസിൽ പരീക്ഷ എഴുതിയ കുട്ടികളോട് ക്വാറന്റീനിൽ പോകാൻ ആവശ്യപ്പെട്ടിട്ടുണ്ട്. പരീക്ഷ എഴുതിയ വിദ്യാർത്ഥികളുടെ പൂർണ വിവരങ്ങൾ അധികൃതരുടെ കൈവശമുള്ളതിനാൽ സമ്പർക്കപ്പട്ടിക സങ്കീർണമാവില്ല. വിദ്യാർത്ഥികൾ തമ്മിൽ സാമൂഹ്യ അകലം പാലിച്ചതിനാൽ പ്രശ്നം ഗുരുതരമാവില്ലെന്നാണ് ആരോഗ്യ വകുപ്പിന്റെ നിഗമനം.
ഇത് കൂടാതെ കോഴിക്കോട് ജില്ലയിലും കൊല്ലം ജില്ലയിലും പരീക്ഷയെഴുതിയ ഓരോ കുട്ടികൾക്കുമാണ് രോഗം സ്ഥിരീകരിച്ചത്.