മനാമ: വൈദിക ബാലപീഡനത്തിനെതിരെ കത്തോലിക്കാ സഭ കഴിയുന്നത്ര പോരാടുന്നുണ്ടെന്ന് ഫ്രാന്‍സിസ് മാര്‍പ്പാപ്പ. 'സഭയ്ക്കുളളില്‍ കുട്ടികള്‍ ദുരുപയോഗം ചെയ്യപ്പെടുന്നു എന്നത് ദാരുണമായ കാര്യമാണ്. അതിനെതിരെ ഞങ്ങള്‍ കഴിയുന്നത്ര നന്നായി പ്രവര്‍ത്തിക്കുന്നുണ്ട്. എന്നാല്‍ ഇതിനെക്കുറിച്ച് വ്യക്തതയില്ലാത്ത കുറേയധികം പേര്‍ സഭയ്ക്കുളളില്‍തന്നെ ഉണ്ട്. ഞങ്ങള്‍ വൈദിക ബാലപീഡനത്തിനെതിരായ പോരാട്ടം തുടരുകയാണ്'- ഫ്രാന്‍സിസ് മാര്‍പ്പാപ്പ പറഞ്ഞു. ബഹ്‌റൈന്‍ സന്ദര്‍ശനത്തിനുശേഷം തിരികെ മടങ്ങവേ വിമാനത്താവളത്തില്‍വെച്ച് മാധ്യമപ്രവര്‍ത്തകരോട് സംസാരിക്കുകയായിരുന്നു അദ്ദേഹം.
മുസിരിസ് പോസ്റ്റിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
1980-കളുടെ പകുതിയിലാണ് ആദ്യമായി സഭകള്‍ക്കുളളിലെ ബാലപീഡനത്തെക്കുറിച്ചുളള വാര്‍ത്തകള്‍ പുറത്തുവരുന്നത്. തുടര്‍ന്ന് ഓസ്‌ട്രേലിയ, ചിലി, ഫ്രാന്‍സ്, യുഎസ് തുടങ്ങി ലോകമെമ്പാടുമുളള രാജ്യങ്ങളില്‍ ബാലപീഡകരായ പുരോഹിതരെക്കുറിച്ച് ആരോപണങ്ങളുയര്‍ന്നു. ഈ വിഷയത്തില്‍ 'സീറോ ടോളറന്‍സ്' സമീപനമാണ് കത്തോലിക്ക സഭ സ്വീകരിക്കുന്നതെന്ന് ഫ്രാന്‍സിസ് മാര്‍പ്പാപ്പ പറഞ്ഞു. നല്ല കാര്യങ്ങള്‍ക്കായി ദൈവത്തോട് നന്ദി പറയുമ്പോള്‍ മോശം കാര്യങ്ങള്‍ക്ക് സഭ ലജ്ജിക്കണമെന്നും അദ്ദേഹം കൂട്ടിച്ചേര്‍ത്തു.
നാലുദിവസത്തെ സന്ദര്‍ശനത്തിനായാണ് ഫ്രാന്‍സിസ് മാര്‍പ്പാപ്പ ബഹ്‌റൈനിലെത്തിയത്. ലോക മതസമ്മേളനത്തില്‍ 'കിഴക്കും പടിഞ്ഞാറും മനുഷ്യന്റെ നിലനില്‍പ്പിന്' എന്ന വിഷയത്തില്‍ സംസാരിക്കാനായിരുന്നു മാര്‍പ്പാപ്പയുടെ ബഹ്‌റൈന്‍ സന്ദര്‍ശനം.
